واشنگٹن (نیر زیدی / نمائندہ جنگ) واشنگٹن پوسٹ نے ایک تفصیلی خبر میں جیو ٹی وی کے اسٹریٹ شوز کی عوام میں مقبولیت کا ذکر کیا ہے اور لکھا ہے کہ جیو کی یہ کوشش عوام تک صحیح معلومات پہنچانے کے عزم کی عکاسی کرتی ہے۔ انہوں نے جنگ گروپ کے اس عزم کا بھی ذکر کیا ہے کہ وہ پریس کی خود مختاری کے محاذ پر ڈٹا رہے گا خواہ اسے کروڑوں ڈالر کا نقصان ہی کیوں نہ ہو۔ پاکستان کے دیگر دو ٹی وی چینلوں کے بارے میں پوسٹ نے لکھا ہے کہ دونوں نے حکومت سے افہام وتفہیم کے بعد نشریات شروع کی ہیں۔ دبئی سے نشریات کرنے والے چینل نے ایک غیر سرکاری معاہدے کے تحت اپنے Talk Shows بند کرنے کا وعدہ کیا ہے اور ایک ہفتے سے اس پر کوئی ٹاک شو نظر نہیں آیا ہے۔ کراچی کے ایک بزنس گروپ کی چینل کے ٹاک شو پر بھی پابندی ہے۔ دبئی کے چینل کے ایک نامہ نگار نے پوسٹ کو بتایا کہ ان پر دباؤ کی ایک وجہ یہ بھی تھی کہ ان کے کئی نامہ نگاروں کو حراست میں لے لیا گیا تھا اور ان پر بین الاقوامی دباؤ تھا کہ وہ نشریات مکمل طور پر بند نہ کریں۔ پوسٹ کا کہنا ہے کہ راولپنڈی پریس کلب کے باہر Capital Talk کے میزبان جناب حامد میر کا شو علاقے میں جمہوری قوتوں کا محور بن گیا ہے اور وہ ملک میں چند حقیقی جمہوری سرگرمیوں میں سے ایک کی صدارت کرتے نظر آتے ہیں۔

__________________