لاہور (جنگ نیوز) پاکستان مسلم لیگ پنجاب کے صدر اور سابق وزیراعلیٰ پنجاب چوہدری پرویزالٰہی نے پارٹی کے عہدیداروں سے کہا ہے کہ لاہور میں انتخابی مہم کو مزید تیز کریں تا کہ بہتر نتائج حاصل کئے جا سکیں۔ وہ منگل کو پارٹی کے لاہور سے ٹکٹ حاصل کرنے والے لیگی امیدواروں کے اجلاس سے خطاب کر رہے تھے جس میں میاں محمد اظہر‘ ہمایوں اختر‘ مونس الٰہی‘ میاں اسلم اقبال‘ خواجہ طاہرضیاء‘ طارق بانڈے‘ میاں آصف اور دیگر ٹکٹ ہولڈر بھی موجود تھے۔ انہوں نے کہا کہ الیکشن کا ماحول لاہور سے تیز ہو گا تو باقی صوبے میں بھی ماحول تیز ہو جائے گا۔ انہوں نے امیدواروں سے کہا کہ وہ اپنے اپنے حلقوں میں زیادہ سے زیادہ کارنر میٹنگز کریں اور لوگوں سے رابطے کو مزید تیز کریں تا کہ الیکشن کے دوران کسی قسم کی کوئی کمی نہ رہے۔ چوہدری پرویزالٰہی نے کہا میثاق جمہوریت کو’ مذاق جمہوریت ‘بنانیوالی پیپلزپارٹی (ن) لیگ کو بھی ڈبو کرچھوڑے گی، بینظیر سے گٹھ جوڑ کرنیوالا کوئی رہنما مسلم لیگی نہیں ہوسکتا۔انہوں نے کہا کہ جو لوگ انتخابات سے بائیکاٹ کی باتیں کر رہے ہیں ان لوگوں نے بائیکاٹ نہیں کرنا ہے اس لئے میدان میں انکا بھرپور مقابلہ کریں۔ پیپلز پارٹی اور ن لیگ کے پاس نہ تو کوئی پروگرام ہے نہ کوئی ایجنڈا اور نہ ہی کوئی ہوم ورک ہے۔ انہوں نے کہا کہ انتخابی تاریخ کی سب سے بڑی دھاندلی کی موجد پیپلزپارٹی اپنے پرانے ہتھکنڈوں پر اتر آئی ہے لیکن عوام ان کی ریکارڈ دھاندلی سے بخوبی واقف ہیں اس لیے آئندہ انتخابات میں پیپلزپارٹی کا اپنا شیرازہ بکھر جائے گا۔ چوہدری پرویزالٰہی نے کہا کہ بینظیر بھٹو کو الیکشن میں اپنی واضح شکست دکھائی دے رہی ہے جس کی وجہ سے وہ ن لیگ کی کشتی پر ایک دفعہ پھر سواری کرنے کیلئے پر تول رہی ہے لیکن میثاق جمہوریت کو مذاق جمہوریت بنانے پیپلز پارٹی والی ن لیگ کو بھی اپنے ساتھ ہی ڈبو کر چھوڑے گی۔ انہوں نے کہا کہ پاکستان مسلم لیگ ملک بنانے اور اسے مستحکم کرنے والی جماعت ہے لہٰذا پیپلزپارٹی کے ساتھ گٹھ جوڑ کرنے والا کوئی لیڈر کم از کم مسلم لیگی نہیں ہو سکتا۔ انہوں نے کہا کہ پاکستان کے تمام مسلم لیگی کارکن ملک کے وسیع تر مفاد میں ان سیاسی مہاجرین کو مسترد کرتے ہوئے پاکستان مسلم لیگ کے ہاتھوں کو مضبوط کریں گے۔