13 ستمبر 2010
ملتان (مانیٹرنگ ڈیسک) وزیراعظم سید یوسف رضا گیلانی نے کہاہے کہ سابق صدر پرویز مشرف پر متعدد مقدمات ہیں اور اگر وہ واپس آئے تو ان کا استقبال چیف جسٹس آف پاکستان کریں گے۔ ملتان میں مسلم لیگ ن کے مرکزی رہنماءمخدوم جاوید ہاشمی کی عیادت کے بعد میڈیا سے گفتگو میں انہوں نے کہا کہ پرویز مشرف کی واپسی کا علم نہیں۔ ان کا کہنا تھا کہ ملک میں ادارے مضبوط ہیں، جمہوریت کو پٹڑی سے نہیں اترنے دیں گے۔ وزیر اعظم نے کہا کہ میاں نواز شریف اور چیف جسٹس دونوں جمہوریت کے حامی ہیں۔انہوں نے کہا کہ جمہوریت میں خامیون پر تنقید کرنا ہر ایک حق ہے۔وزیر اعظم نے کہا کہ مزید صوبوں کے قیام سے متعلق فیصلہ عوام نے کرنا ہے۔انہوں نے کہا کہ وہ کالا باغ ڈیم کے مخالف نہیں تاہم اس کی تعمیر تب ہی ممکن ہے جب اس مکمل اتفاق رائے ہو۔انہوں نے کہا سیلاب متاثرین میں فی گھر ایک ایک لاکھ روپے تقسیم کرنے کیلئے ساڑھے تین ارب روپے درکار ہونگے۔ اس سے قبل ملتان میں عمائدین شہر اور ارکان پارلیمنٹ سے خطاب میں وزیراعظم نے کہا ” ہم سے کوتاہیاں بھی ہورہی ہیں لیکن اچھے کام بھی کررہے ہیں، صرف مفاہمت کی پالیسی ہی کامیاب ہوسکتی ہے“۔

__________________
جاویداسد