جنوبی وزیرستان میں محسود قبیلے سے تعلق رکھنے والے پاکستانی طالبان نے انیس مغوی سرکاری اہلکاروں کو رہا کر دیا ہے۔ پولیٹکل افسر شائستہ خان کے مطابق اغواکاروں نے مغویان کو جرگہ کے حوالے کر دیا ہے۔
پیر کو محسود قبیلے کی تین بڑی ذیلی شاخوں پر مشتمل جرگے ’درے محسود‘ نے یقین دہانی کرائی تھی کہ مغویان کو اگلے چوبیس گھنٹوں میں رہا کرا لیا جائے گا۔ مغویان کو ابھی حکومت کے حوالے نہیں کیا گیا ہے۔

رکن قومی اسمبلی مولانا معراج الدین کا کہنا ہے کہ مغوی اہلکاروں کی رہائی غیر مشروط طور پر عمل میں آئی ہے، تاہم انہوں نے کہا کہ حکومت سے انہوں نے سراروغہ امن معاہدے کی پاسداری کا تقاضا ضرور کیا ہے۔
سے قبل بھی کئی مرتبہ ایسی اطلاعات سامنے آئیں کہ اغوا کاروں نے ان اہلکاروں کو رہا کرنے کا اعلان کیا ہے اور ان کی رہائی مرحلہ وار طریقے سے ہوگی لیکن ایسا نہیں ہوسکا۔

اس جرگے نے اس سے قبل اتوار کو صدر مقام وانا میں پولیٹکل ایجنٹ سے بھی ملاقات کی تھی۔ اس کے بعد پولیٹکل ایجنٹ سے منسوب ایک اخباری بیان میں یہ کہا گیا تھا کہ حکومت دس افراد کو رہا کرنے کے طالبان کے مطالبے کو مان رہی ہے۔
تاہم جرگہ رکن سینیٹر صالح شاہ نے اس کی تصدیق نہیں کی۔ ان کا اصرار تھا کہ رہائی قبائلی جرگے کے احترام میں کی گئی ہے۔ طے شدہ پروگرام کے مطابق مغویان کو منگل کو جرگہ کے حوالے کیا جانا تھا اور اس کے بعد وہ وانا میں پولیٹکل انتظامیہ کے پاس پہنچیں گے۔

یاد رہے کہ نو اگست کو جنوبی وزیرستان سے ساؤتھ وزیرستان سکاؤٹس کے سولہ اہلکاروں کو اغواء کر لیا گیا تھا، جن میں سے ایک کی بعد میں لاش ملی تھی۔ اس واقعہ کے دو ہفتے بعد چوبیس اگست کو لدھا کے مقام سے فوج کے ایک لیفٹیننٹ کرنل اور ان کے محافظ، ایک تحصیلدار اور صوبیدار کو بھی اغواء کر لیا گیا تھا۔

طالبان نے ہلاک کیے جانے والے سپاہی کی ویڈیو بھی عمر سٹوڈیو کے نام سے جاری کی تھی۔

جنوبی وزیرستان کے محسود جنگجو مبینہ طور پر جن دس افراد کی رہائی کا مطالبہ کر رہے تھے اطلاعات کے مطابق انہیں حکومت نے خودکش حملوں کی تیاری یا عبداللہ محسود کے ساتھی ہونے کے الزام میں گرفتار کر رکھا ہے۔