وزیرستان پر میزائل حملے سے قبل امریکہ نے ہمیں آگاہ نہیں کیا‘حملوں سے تعلقات خراب ہوسکتے ہیں‘ پاکستان
اسلام آباد (پاک ڈاٹ نیٹ) پاکستان نے امریکی حکام کی یقین دہانیوں کے باوجود وزیرستان پر میزائل حملے پر سخت تشویش کا اظہار کرتے ہوئے کہا ہے کہ میزائل حملوں سے دہشت گردی کے خلاف جاری جنگ متاثر ہوسکتی ہے اور پاکستان اور امریکہ کے درمیان تعلقات پر بھی منفی اثر پڑے گا‘ سرحد پار سے حملے کسی صورت برداشت نہیں کئے جائیں گے‘ سرحد پار سے حملوں سے ایسا لگ رہا ہے کہ امریکی حکومت اور فوج کے درمیان رابطوں کی کمی ہے‘ صدرآصف علی زرداری دورہ امریکہ کے دوران صدر بش سے ملاقات کے دوران سرحد پار سے میزائل حملوں پر بات کریں گے‘ امریکہ پاکستان کی خودمختاری کا احترام کرے۔ان خیالات کا اظہار وزیر خارجہ شاہ محمود قریشی نے جمعرات کے روز یہاں وزارت خارجہ میں پریس کانفرنس سے خطاب کرتے ہوئے کیا۔ انہوں نے کہا کہ سرحد پار مداخلت سے امریکہ کو کوئی طویل المدتی فائدہ نہیں ہوگا۔ انہوں نے کہا کہ تمام ممالک کو ایک دوسرے کی خودمختاری کا احترام کرنا چاہئے۔ وزیر خارجہ نے کہا کہ امریکہ نے گزشتہ روز میزائل حملے سے آگاہ نہیں کیا حملے سے معلوم ہوتا ہے کہ امریکی فوج اور حکومت کا کوئی رابطہ نہیں۔ شاہ محمود قریشی نے مزید کہا کہ دورہ پاکستان کے موقع پر مائیکل مولن نے یقین دلایا تھا کہ پاکستانی خودمختاری کا احترام کیا جائے گا انہوںنے کہا کہ حکومت اور فوج میں مکمل ہم آہنگی ہے جبکہ افغانستان میں نیٹو افواج امریکی اور افغان فورسز کے درمیان بھی رابطوںکا فقدان ہے۔ وزیر خارجہ نے کہا کہ حملوںاور جذباتی بیانات سے مزید پیچیدگیاں پیدا ہوسکتی ہیں۔ انہوں نے کہا کہ سرحد پار حملوں سے دہشت گردی کے خلاف جنگ متاثر ہوگی وزیر خارجہ نے کہا کہ انتہا پسندی کے خلاف جاری جنگ میں سب سے زیادہ پاکستان کے عوام متاثر ہوئے ہیں ایک سوال کے جواب میں انہوںنے کہا کہ بینظیر بھٹو کے قتل کی اقوام متحدہ سے تحقیقات میں پیش رفت جاری ہے۔ انہوں نے بتایا کہ صدر آصف علی زرداری 22ستمبر کو امریکہ کا دورہ کریں گے ایک اور سوال کے جواب میں انہوں نے کہا کہ امریکی افواج نے وعدے کے باوجود معاہدے کی خلاف ورزی کی ہے وزیر خارجہ نے کہا کہ صدر اپنے دورہ امریکہ کے موقع پر امریکی صدر بش اور بھارتی وزیراعظم ڈاکٹر من موہن سنگھ سے ملاقات کریں گے انہوں نے کہا کہ دہشت گردی کے خلاف جنگ میں پاکستان کو بڑے نقصانات اٹھانا پڑے ہیں۔ شاہ محمود قریشی نے کہاکہ امریکہ معاہدوں کی پاسداری کرتے ہوئے ملکی خودمختاری کا احترام کرے۔ انہوں نے کہا کہ امریکی میزائل حملوںپر پاکستان میں امریکی سفیر این ڈبلیو پیٹرسن کو دفتر خارجہ طلب کرکے احتجاج کیا گیا ہے عوام کی بڑھتی ہوئی تسویش سے آگاہ کیا ہے وزیر خارجہ نے کہا کہ امریکہ پر واضح کردیا کہ پاکستان کی خودمختاری کو یقینی بنایا جائے دونوں ممالک کے تعلقات پر منفی اثر پڑسکتے ہیںانہوں نے کہا کہ مقبوضہ کشمیر میں نہتے کشمیریوں پر بھارتی فوج کے بڑھتے ہوئے مظالم قابل تشویش ہیں اور پاکستان نے اس مسئلے کو او آئی سی سمیت دیگر فورمز پر بھی اٹھایا ہے۔