آج ہی پاک نیٹ پر یہ خبر بھی شائع ہوئی کہ بحریہ نے بغیر پائیلیٹ طیارے تباہ کرنے کی صلاحیت حاصل کرلی ، لیکن جب روز بروز پاکستان پر ہونے والے حملوں اور ہلاکتوں میں اضافہ ہو رہا ہے تو پاکستان کا ان ٹیکنالوجیز حاصل کرنے کا کیا فائدہ ہے؟

پاکستان کے قبائلی علاقے شمالی وزیرستان میں منگل کو امریکی ڈرون طیاروں نے تین حملے کیے جن میں بائیس افراد ہلاک اور سات زخمی ہوگئے۔ اس طرح گزشتہ چوبیس گھنٹوں میں پانچ ڈرون حملوں میں ہلاک ہونے والوں کی کل تعداد چالیس ہوگئی ہے جبکہ سات افراد زخمی ہوئے ہیں۔ حکام کے مطابق شمالی وزیرستان میں صدر مقام میران شاہ سے تقریباً پندرہ کلو میٹر مغرب کی جانب افغان سرحد کے قریب تحصیل غلام خان کے علاقے سیر خیل میں منگل کی صبح ایک ڈرون حملہ ہوا جس میں ایک احاطے پر دو میزائیل داغے گئے۔


اس حملے میں جس احاطے کو نشانہ بنایا گیا اس کے بارے میں کہا جاتا ہے کہ وہ مقامی طالبان کمانڈر حافظ گل بہادر کے گروپ سے تعلق رکھنے والے لوگوں کا ٹھکانہ تھا۔ پولیٹکل انتظامیہ کے اہلکاروں نے مزید بتایا کہ حملے میں احاطے میں قائم رہائشی عمارت کو شدید نقصان پہنچا جبکہ اس کے صحن میں کھڑی ایک گاڑی بھی تباہ ہو گئی۔ اس حملے میں سات افراد ہلاک اور دو زخمی ہو گئے۔ حکام نے بتایا کہ اس حملے کے ایک گھنٹے بعد جب لوگ ملبے سے لاشیں نکلنے میں مصروف تھے تو عین اسی جگہ پر ایک اور میزائیل آ کر لگا جس کے نتیجے میں مزید بارہ افراد مارے گئے۔

ان حملوں کے ایک گھنٹے کے بعد صدر مقام میران شاہ کے قریب ایک گاڑی ڈرون سے داغے گئے میزائیل کا نشانہ بنی۔ اس حملے میں مزید تین افراد لقمہ اجل بن گئے۔ مقامی حکام کا کہنا ہے کہ منگل کو بغیر پائلٹ کے طیارے نے مبینہ طور پر شدت پسندوں کے ٹھکا نوں پر یکے بعد دیگرے کئی میزائیل داغے۔


اس طرح صرف منگل کو ہونے والے تین حملوں میں مرنے والوں کی تعداد بائیس ہو گئی۔ جبکہ گزشتہ دو دنوں میں ڈرون حملوں میں مرنے والوں کی تعداد چالیس تک پہنچ گئی ہے۔اس علاقے میں زیادہ تر ٹھکانے افغان طالبان کمانڈر جلال الدین حقانی کے بتائے جاتے ہیں اور حملے بھی زیادہ تر ان کے ہی ٹھکانوں پر ہوئے ہیں۔ اس علاقے میں ایک سال قبل بھی پاکستان کی سکیورٹی فورسز نے جلال الدین حقانی کے ایک مدرسے کو تباہ کردیا گیا تھا۔ جس میں سینکڑوں طلبا زیر تعلیم تھے۔ اس کار روائی کے بعد طلبا دوسرے علاقوں میں منتقل ہوگئے تھے۔حکام یہ بھی بتاتے ہیں کہ ہلاک ہونے والوں میں کسی اہم شخصیت کا نام سامنے نہیں آیا ہے۔ اس سے پہلے پیر کو ہوئے دوحملوں میں اٹھارہ افراد ہلاک اور چھ زخمی ہوگئے تھے۔

یاد رہے کہ سرکاری اعداد و شمار کے مطابق، اس میزائل حملے کے بعد شمالی اور جنوبی وزیرستان میں اس سال ہونے والے ڈرون حملوں کی تعداد ایک سو سے زیادہ ہوگئی ہے۔

بی بی سی سے اقتباس

__________________
عرفی تومیندیش ذغوغائے رقیباں - آواز سگاں کم نہ کند رزق گدارا
میرا بلاگ | yasirimran.wordpress.com