کوئٹہ ( اسٹاف رپورٹر) نگران وزیراعلیٰ سردار محمد صالح بھوتانی نے ضلع کوئٹہ میں 80 ملین روپے کی لاگت سے 28 ترقیاتی منصوبے شروع کرنے کا اعلان کیا ہے جبکہ نگران وزراء کے توسط سے ایک ایک کروڑ کی لاگت سے منصوبوں پر عملدرآمد ہو گا اس بات کا اعلان نگران وزیراعلیٰ نے گزشتہ روز چیف منسٹرسیکرٹریٹ میں ایک پریس کانفرنس سے خطاب میں کیا انہوں نے کہا کہ صدر پرویز مشرف سے ہونے والی ملاقات میں صدر نے اس امر پر زور دیا کہ بلوچستان میں ترقی کا تسلسل جاری رہنا چاہئے اور اس سلسلے میں صدر کی بھرپور حمایت اور تعاون حاصل ہے انہوں نے کہا کہ ضلع کوئٹہ میں 80 ملین روپے کی لاگت سے 28 منصوبوں کی تکمیل سے کوئٹہ شہر اور اس کے شہریوں کا معیار زندگی بلند ہو جائے گا ، نگران وزیراعلیٰ نے کہا کہ عوام اور صوبے کی بااثر شخصیات کے تعاون سے نگران حکومت نے صوبے میں امن وامان قائم کر دیا ۔ ایک سوال کے جواب میں انہوں نے کہا کہ صوبے میں کہیں کوئی آپریشن نہیں ہو رہا مگر جہاں فورسز پر حملے ہوں گے وہاں تحقیقات ضرور ہوگی ا ایک سوال کے جواب میں انہوں نے کہا کہ صوبے کے تمام سیاسی قیدیوں اور وکلاء کو رہا کر دیا گیا ہے اور جو لوگ ابھی بند ہیں انہیں بھی جلد رہا کر دیا جائے گا اس موقع پر انہوں نے کہا کہ نگران حکومت یا اس میں شامل کسی وزیر کے سیاسی عزائم نہیں اور نہ ہی ہم نے جانبداری کا مظاہرہ کیا ہے اگر کہیں ایسا ہوا تو اس کی نشاندہی کی جائے سخت نوٹس لیا جائے گا ۔

__________________