واشنگٹن (مانیٹر نگ ڈیسک)امریکی صدر باراک اوباما کی طرف سے گراونڈ زیرو پر مسلمانوں کی ایک مسجد کی تعمیر کی حمایت کرنے پر امریکہ میں صدر اوبامہ کو شدید تنقیدکا سا منا ہے اور صدر اپنے موقف کا دفاع اور وضاحت کرنے پر مجبور ہو گئے ہیں۔امریکہ میں9/11کے دہشت گردانہ حملوں کی جگہ گراونڈ زیرو کے قریب مسجد اور ایک اسلامی ثقافتی مرکز ایک تیرہ منزلہ کمپلیکس کی صورت میں تعمیر کئے جائیں گے۔ یہ تعمیراتی منصوبہ گزشتہ کئی مہینوں سے انتہائی متنازعہ ہے۔ ابھی حال ہی میں ایک امریکی عدالت نے بالواسطہ طور پر اپنے ایک فیصلے کے ذریعے اس منصوبے کو جائز قرار دے دیا تھا۔ امریکہ میں بہت سے قدامت پسند حلقے، ریپبلکن سیاستدان اور نیویارک کے بہت سے شہری بھی مین ہیٹن کے علاقے میں ایک بہت بڑی اور نئی مسجد کی تعمیر کے خلاف ہیں۔امریکی صدر اوباما نے ہفتے کی رات ریاست فلوریڈا کے ایک دورے کے دوران کہا کہ انہوں نے یہ تبصرہ نہیں کیا تھا کہ آیا سابقہ ورلڈ ٹریڈ سینٹر کی جگہ سے بہت قریب نئی مسجد تعمیر کرنا کوئی دانش مندانہ فیصلہ ہے۔انہوں نے کہا، میں ایسا کوئی تبصرہ نہیں کروں گا۔ اصل بات بہت مشکل حالات میں بھی یہ یاد رکھنا ہے کہ مذہبی آزادی کے حق سمیت امریکہ کی بنیادی اقدار کیا ہیں۔امریکہ میں نائن الیون کے متاثرین کی تنظیم کا دعویٰ ہے کہ مین ہیٹن میں قرطبہ مسجد کمپلیکس کی مجوزہ تعمیر قریب تین ہزار ہلاک شدگان کے لواحقین کو اشتعال دلانے کی کوشش ہے، جو مبینہ طور پر مزید نفرت اور خونریزی کا سبب بنے گی۔امریکہ میں اسی بحث کے دوران ملکی کانگریس کے ریپبلکن رکن پیٹر کنگ نے الزام لگایا ہے کہ صدر اوباما اپنے موقف کے ساتھ درست سیاسی رویے کے دائرہ کار سے باہر نکل گئے ہیں۔ انہوں نے کہا کہ امریکی مسلمان اس مسجد کی تعمیر کے ذریعے اپنے حقوق کا غلط استعمال کرتے ہوئے بہت سے انسانوں کی بلاوجہ تذلیل کر رہے ہیں۔اس کے برعکس نیویارک کے میئر مائیکل بلومبرگ نے نہ صرف صدر اوباما کے واضح اصولی موقف کا خیر مقدم کیا ہے بلکہ یہ بھی کہا ہے کہ جس طرح صدر نے مذہبی آزادی کے بنیادی حق کا دفاع کیا ہے، وہ قابل تعریف ہے۔ بلومبرگ کے مطا بق دیگر عقیدوں کے پیروکاروں کی طرح مسلمانوں کے بنیادی اور مساوی مذہبی اور قانونی حقوق کی بھی مکمل حمایت کی جانی چاہئے۔

__________________
جاویداسد