وفاق اور صوبوں میں 5مارچ تک سر کاری ملازمین کے تبادلوں اور تقر ریوں پر پابند ی
کراچی (اسٹاف رپورٹر) حکومت پاکستان کی ہدایت پر وفاقی اور چاروں صوبائی حکومتوں میں سرکاری ملازمین کے تبادلوں اور تقرریوں پر ٰ5 مارچ 2008ء تک پابندی عائد کردی گئی ہے۔ انتہائی باخبر ذرائع نے جنگ کو بتایا ہے کہ انتخابات کے بعد بڑے پیمانے پر تبادلوں اور تقرریوں کا سلسلہ شروع ہوگیا تھا اور خاص طور پر وفاقی اور صوبائی نگراں وزراء کی جانب سے اپنی وزارتوں اور محکموں پر تبادلوں اور تقرریوں کے لئے مسلسل دباؤ بڑھتا جارہا تھا جس پر بعض وفاقی اور صوبائی سیکریٹریوں نے تحفظات کا اظہار کیا اور کہا کہ یہ سلسلہ اگر جاری رہا تو نئی حکومتوں کے قیام تک بہت سے مسائل پیدا ہوجائیں گے۔ اس بات کے پیش نظر اسٹیبلشمنٹ ڈویژن حکومت پاکستان نے وفاقی حکومت میں تبادلوں اور تقرریوں پر پابندی عائد کردی اور ساتھ ہی صوبائی حکومتوں کو بھی ہدایت کی کہ وہ بھی پابندی عائد کردیں۔ سروسز ، جنرل ایڈمنسٹریشن اینڈ کوآرڈی نیشن ڈیپارٹمنٹ حکومت سندھ نے بھی جمعرات کو تبادلوں اور تقرریوں پر پابندی عائد کرنے کا نوٹیفکیشن جاری کردیا ہے تاہم ضروری تبادلوں و تقرریوں کے لئے مذکورہ ڈیپارٹمنٹ سے این او سی حاصل کرنا ہوگا۔

__________________