وکلاء تحریک فوجی آمریت کے خاتمے تک جاری رہے گی، اعتزاز احسن

) ممتاز قانون دان اعتزازاحسن نے کہا ہے کہ وکلاء تحریک چیف جسٹس کی بحالی پر ختم نہیں ہوئی ہم اپنی جدوجہد فوجی آمریت کے خاتمے اور جمہوریت کی بحالی تک جاری رکھیں گے۔ وہ لاہور ہائیکورٹ بار ایسوسی ایشن میں وکلاء تحریک کے بارے میں ایک کتاب کی تقریب رونمائی میں خطاب کر رہے تھے۔ اس موقع پر حامدخان، علی احمد کرد اور صاحبزادہ انورحمید بھی موجود تھے۔ اعتزازاحسن نے کہاکہ اگر جنرل پرویزمشرف کی 2000ء سے شروع ہونے والی پہلی مدت غیرآئینی ہے تو کیا پی سی او کے تحت حلف اٹھانے والے ججز بھی غیرآئینی ہیں ؟ ججز کی طرف سے یہ کہنا کہ پہلے قوم کو سڑکوں پر لایا جائے غلط ہے۔ آرمی چیف کسی بھی صورت سیاست میں حصہ نہیں لے سکتا۔ انہوں نے کہاکہ جنرل پرویزمشرف کی پہلی مدت 21جون 2000ء اور دوسری مدت 16نومبر 2002ء کو شروع ہوتی ہے لیکن بعض ججز کا یہ کہنا ہے کہ ان کی پہلی مدت کے وقت آئین معطل تھا، اس لئے وہ مدت آئین کے مطابق نہیں ہے تو پھر ان سے سوال ہے کہ جن ججز نے پی سی او کے تحت حلف اٹھایا کیا وہ بھی غیرآئینی ہیں ہمیں امید ہے کہ عدالتی فیصلہ حق سچ اور قانون کے مطابق ہوگا۔ علی احمد کرد نے کہاکہ یہ سپریم کورٹ وہ ہے جس پر داغ اور دھبے لگے ہوئے ہیں جسے دھونے کے لئے انہیں نظریہ ضرورت اور اس کی روح کو بھی ہمیشہ کے لئے دفن کرنا ہوگا ا حامدخان نے کہاکہ کسی کو بھی یہ اجازت نہیں دی جائے گی کہ وہ امریکی ایجنڈا لے کر اقتدار پر قابض ہو۔ انہوں نے کہاکہ فوجی حکمرانوں نے ماضی میں بھی پاور ٹرانسفر نہیں کی تھی بلکہ پاور شیئرنگ کا منصوبہ بنایا تھا اور ان کی اسی حرکت کی وجہ سے پاکستان دو حصے ہوگیا اور اب ایک دفعہ پھر پاورشیئرنگ کا ڈرامہ رچانے کی کوشش کی جا رہی ہے جو ملک کیلئے نقصان دہ ہوگا۔ صاحبزادہ انورحمید نے کہاکہ وکلاء نے جس کامیابی کے ساتھ چیف جسٹس کی بحالی کی تحریک میں حصہ لیا ہے، اسی جوش و جذبہ کے ساتھ آمریت کے خاتمے کی تحریک میں بھی حصہ لے رہے ہیں۔ تقریب کے اختتام پر وکلاء تحریک اور 18اکتوبر کو کراچی میں جاں بحق ہونے والوں کے لئے فاتحہ خوانی بھی کی

بشکریہ
جنگ

__________________