کراچی (ایجنسیاں، جنگ نیوز) پی سی او کے تحت حلف نہ اٹھانے والے سپریم کورٹ کے دو ججوں، جسٹس رانا بھگوان داس اور جسٹس غلام ربانی کو اتوار کی دوپہر پی آئی اے کی ایک پرواز کے ذریعے کراچی بھیج دیا گیا۔ وکلاء اور سول سوسائٹی کے افراد کی بڑی تعداد ان کو الوداع کرنے کیلئے اسلام آباد ائرپورٹ پر موجود تھی۔ وکلاء نے پی سی او کے تحت حلف نہ اٹھانے والے ججوں کے حق میں نعرے لگائے۔اس موقع پر کسی بھی ناخوشگوار واقعہ سے نمٹنے کے لیے پولیس کی بھاری نفری موجود تھی۔ کراچی ائر پورٹ پہنچنے پر جسٹس رانا بھگوان داس نے صحافیوں سے بات چیت کرتے ہوئے کہا کہ ججوں کا پہلے پی سی او اور بعد میں73ء کے آئین کے تحت حلف اٹھانا غیرآئینی ہے،میں 73ء کے آئین کے تحت ریٹائر ہوا جس پر مجھے فخر ہے،سیاست میں آنے کا کوئی ارادہ نہیں، وکلاء نے بلایا تو عدلیہ کی بحالی کی تحریک میں ضرور شامل ہونگا۔ ان خیالات کا اظہار انہوں نے کراچی ائر پورٹ پر صحافیوں سے بات چیت کرتے ہوئے کیا۔ انہوں نے کہاکہ وہ ملک میں ایمرجنسی کے نفاذ اور بعد میں اسے اٹھانے کے عمل کو بھی غیر آئینی قراردیتے ہیں، مجھے فخر ہے کہ میں 73ء کے آئین کے تحت اپنے عہدے سے ریٹائر ہوا ہوں۔ انہوں نے کہا کہ میں اپنی عمر کے حساب سے ریٹائر ہوا ہوں، تمام ججز اگر بحال ہو بھی گئے تو میں بحال نہیں ہو سکوں گا۔ انہوں نے کہا کہ آئین کے بحال ہوتے ہی 3 نومبر کو سپریم کورٹ کے 7 رکنی بینچ کی طرف سے جاری کیا گیا فیصلہ بھی بحال ہوگیا ہے، چونکہ اب پی سی او ختم ہوچکا ہے، میں اب اپنی یادداشتیں لکھوں گا۔ انہوں نے کہاکہ میں نے رضاکارانہ طورپر اپنا گھر خالی کیا ہے ۔ دوسری جانب جسٹس غلام ربانی نے برطانوی خبر رساں ادارے سے بات چیت کرتے ہوئے کہا کہ وہ اب بھی جج ہیں اوراپنی بحالی کیلئے کسی سے بھیک نہیں مانگیں گے۔ انہوں نے کہا کہ انہوں نے پہلے بھی حق کی بات کی ہے اور آئندہ بھی کرتے رہیں گے۔ قبل ازیں جب جسٹس رانا بھگوان داس کراچی ائیرپورٹ پہنچے تو جسٹس (ر) فخرالدین جی ابراہیم اور سندھ ہائی کورٹ بار ایسوسی ایشن کے صدر جسٹس (ر) رشید رضوی نے ان کا پرتپاک استقبال کیا۔اس موقع پر وکلاء اور سول سوسائٹی کے ارکان کی ایک بڑی تعداد وہاں موجود تھی ۔ اس سے پہلے جب جسٹس رانا بھگوان داس کراچی روانگی سے قبل معزول چیف جسٹس افتخار محمد چوہدری کی رہائش گاہ کی طرف جانے لگے تو حکام نے انہیں روک دیا اور زبردستی انہیں واپس گھر کے اندر بھیج کر باہر سے تالے لگادیئے۔

__________________