کراچی، لاہور( اسٹاف رپورٹر، نمائندگان جنگ، ایجنسیاں) ملک میں ایمرجنسی کے نفاذ، چیف جسٹس افتخار محمد چوہدری سمیت دیگر ججوں کی معطلی اور وکلاء کی گرفتاری کے خلاف ملک بھر میں وکلاء کا احتجاج جاری رہا جبکہ مزید 3 روز تک عدالتی بائیکاٹ کا اعلان کیا گیا ہے۔ کراچی میں سٹی کورٹ پولیس نے وکلاء کے خلاف بغاوت کا مقدمہ درج کرلیا ہے، وکلاء نے سٹی کورٹ میں ایک ہینڈ بل تقسیم کیا تھا جس میں حکومت کے خلاف مواد شامل تھا۔ پولیس کے مطابق جن وکلاء نے سٹی کورٹ میں ہینڈ بل تقسیم کئے ان میں ایک خاتون وکیل جمیلہ منظور، مقبول حسن، جاوید تنولی، صابر تنولی، محمد اسلم بھٹی، مسعود الرحمن، خرم نثار اور محمد عمران خان شامل ہیں۔ ہینڈ بل میں جنرل پرویز مشرف کے خلاف مواد موجود تھا۔ پولیس نے مقدمہ درج کرکے مزید تفتیش شروع کردی ہے۔ وکلاء کی بڑے پیمانے پر گرفتاریوں کے بعد لاہور ہائیکورٹ میں بدھ کے روز بھی صورتحال معمول کے مطابق نہ آ سکی۔ پی سی او کے تحت حلف اٹھانے والے جج صاحبان تو موجود تھے لیکن مگر ان کے پاس سائل اور وکلاء نہیں تھے، جو مقدمات سماعت کے لئے پیش ہوئے ان میں صرف سرکاری وکیل ہی عدالت میں پیش ہوئے۔ گزشتہ روز بھی لاہور ہائیکورٹ کے اندر اور باہر پولیس کا سخت ترین پہرہ جاری رہا۔ نمائندہ جنگ کے مطابق لاہور میں مزید 20 وکلاء کو گرفتار کرلیا گیا۔ ایمرجنسی کے خلاف سرکاری تعلیمی اداروں کے علاوہ پرائیوٹ یونیورسٹیوں کے طلبہ نے بھی احتجاجی مظاہرے کئے، پولیس نے تالے لگا کر پرائیوٹ یونیورسٹیاں سیل کردیں، طلبہ نے بازوؤں پر سیاہ پٹیاں باندھیں اور نعرے لگائے۔ لاہور میں پنجاب یونیورسٹی، اوریئنٹل کالج، سائنس کالج اور سول لائنز کالج کے طلبہ نے احتجاج مارچ کیا۔ احتجاج میں اسلام آباد میں قائد اعظم یونیورسٹی، ہمدرد یونیورسٹی اور رفاہ یونیورسٹی کے طلبہ نے حصہ لیا۔ پشاور میں بھی طلبہ نے مظاہرہ کیا۔ ایمرجنسی کے چوتھے روز لاہور میں وکلاء کا احتجاج روکنے کیلئے مال روڈ پر اور ہائیکورٹ کے باہر سیکورٹی کے سخت انتظامات کئے گئے تھے مال روڈ پر پنجاب اسمبلی، مسجد شہداء، جی پی او چوک اور ایوان عدل کے باہر پولیس اہلکار موجود تھے جبکہ سادہ کپڑوں میں ملبوس اہلکار بھی تعینات کئے گئے تھے۔ دریں اثناء گوجرانوالہ، شیخوپورہ، سرگودھا، پھول نگر، سیالکوٹ، ڈیرہ اسماعیل خان، نارووال، کمالیہ، وزیر آباد، ننکانہ صاحب، مریدکے، حافظ آباد، ملتان، قصور اور پنجاب کے دیگر شہروں میں بھی وکلاء نے عدالتی بائیکاٹ کیا۔ کئی شہروں میں پولیس نے وکلاء پر لاٹھی چارج کیا اور متعدد کو گرفتار کرلیا۔ مظاہروں اور احتجاج کا سلسلہ آزاد کشمیر میں بھی جاری رہا۔ ایمرجنسی کے نفاذ کے خلاف پشاور ہائیکورٹ اور ماتحت عدالتوں میں بھی وکلاء کا بائیکاٹ جاری ہے وکلاء نے پشاور ہائیکورٹ کے احاطے میں بھوک ہڑتالی کیمپ لگا دیا ہے کیمپ میں روزانہ دس وکلاء صبح نو بجے سے سہ پہر دو بجے تک بھوک ہڑتال کریں گے۔ دوسری طرف پولیس کی جانب سے وکلاء کی گرفتاری کا سلسلہ جاری ہے۔ ملک میں ایمرجنسی کے نفاذ کے بعد وکلاء نے بدھ کو تیسرے روز بھی سٹی کورٹ ، ملیر کورٹ، لیبر کورٹ، بینکنگ کورٹ، وفاقی اور صوبائی اینٹی کرپشن کورٹ اور دیگر ماتحت عدالتوں میں ہڑتال کی اور عدالتوں کا بائیکاٹ کیا اور عدالتوں میں پیش نہیں ہوئے جبکہ سندھ ہائیکورٹ میں گزشتہ روز کے مقابلے بدھ کو وکلاء کی تعداد زیادہ تھی ہائی کورٹ میں تقریباً 381 مقدمات کی سماعت ہوئی، جبکہ جب ججوں کی تعداد پوری تھی تو روز تقریباً 3000 ہزار مقدمات کی سماعت ہوتی تھی ، سندھ ہائی کورٹ ، سٹی کورٹ اور ملیر کورٹ کے باہر صبح سے ہی سے پولیس و رینجرز کی بھاری نفری تعینات کی گئی تھی جبکہ ہائی کورٹ میں داخل ہونے کیلئے وکلاء اور عوام کو سخت پریشانی کا سامنا کرنا پڑا۔

__________________