ٹرک لوٹ لئے جانے پر کراچی میں اجناس کی شدید قلت کا خدشہ ہے، انیس مجید
کراچی (اسٹاف رپورٹر) چیئرمین کراچی ہول سیل گروسرس ایسوسی ایشن انیس مجید نے کہا ہے کہ اندرون سندھ اور پنجاب سے آنے والے ٹرکوں کو کراچی شہر کے باہر خصوصاً گڈاپ سٹی پولیس اسٹیشن کے علاقے سپرہائی وے پر آئے دن لوٹا جا رہا ہے۔ ان وارداتوں کے سدباب کے لئے ہم نے پولیس کے اعلیٰ حکام سے میٹنگ بھی کی ہیں اور ان کو متعدد خطوط بھی ارسال کئے ہیں لیکن ٹرکوں کو لوٹنے کا سلسلہ تاحال جاری ہے۔ گزشتہ روز بھی پنجاب سے آنے والے چاول کے ایک اور ٹرک کو سپرہائی وے پر لوٹ لیا گیا جس کے باعث اجناس کا کاروبار کرنے والے تاجر حضرات میں شدید بے چینی پائی جاتی ہے۔ انہوں نے کہاکہ اجناس کے تاجر اس لوٹ مار کی وجہ سے اندرون ملک سے مال منگوانا بند کرنا چاہتے ہیں اور اگر اجناس کے تاجروں نے مال منگوانا بند کردیا تو کراچی شہر میں غذائی اجناس کی شدید قلت کا خدشہ ہے جس سے غریب عوام کی مشکلات میں مزید اضافہ ہو جائے گا۔ کراچی میں مال نہ آنے سے ہماری ایکسپورٹ اور امپورٹ پر بھی بہت برا اثر پڑے گا۔ انہوں نے گورنر سندھ، وزیراعلیٰ سندھ اور دیگر اعلیٰ حکام سے اپیل کی ہے کہ اجناس کے ٹرکوں کے اغوا کا فوری نوٹس لیتے ہوئے اس کا سدباب کیا جائے اور لوٹے گئے مال کو برآمد کروایا جائے تاکہ تاجر حضرات بلاخوف اپنا مال منگوا سکیں۔

__________________