ٹنڈو محمد خان:شوگر ملز حادثہ،علاقے میں کشیدگی‘ مل کے باہرپولیس چوکی قائم
ٹنڈو محمد خان (نامہ نگار) ٹنڈو محمد خان میں شوگرملز حادثے کے بعد علاقے میں سخت کشیدگی پائی جاتی ہے جس کے باعث پولیس نے ملز کے تمام داخلی دروازے بند کرکے مین گیٹ پر عارضی پولیس چیک پوسٹ قائم کردی ہے۔ ادھروفاقی وزیر نج کاری کمیشن سرمایہ کاری اور صنعت سید نوید قمر نے سندھ آباد گار شوگر ملز میں حادثے کا نوٹس لیتے ہوئے فوری ریلیف اور واقعہ کی تحقیقات کرنے کی ہدایت جاری کردی ہے ۔وفاقی وزیر سید نوید قمر نے واقعہ میں ہلاک ہونے والوں کے لئے ورثاء سے افسوس کا اظہار کیا اور ضلعی انتظامیہ کو ہدایت کی کہ وہ واقعہ کی تحقیقات کر کے جلد رپورٹ پیش کرے۔ انہوں نے ملز انتظامیہ کو بھی ہدایت کی کہ وہ ورثاء کی ہرممکن مالی مدد کرے، ان کی ہدایت پر ملز انتظامیہ نے ورثاء کو فوری طور پر دس دس ہزار روپے ادا کئے۔واضح رہے کہ سندھ آبادگار شوگر مل میں حادثے میں 8 افراد ہلاک اور 16 سے زائد زخمیوں کا 36 گھنٹے گزرنے کے باوجود تاحال بلڑی شاہ کریم پولیس نے مقدمہ درج نہیں کیا۔دریں اثناء سانحہ شوگرملزکے ہلاک شدگان کو سپردخاک کردیا گیا۔

__________________