کراچی (جنگ نیوز) ملک بھر میں جیو سمیت تمام نجی ٹی وی چینلز کی بندش کو 100 گھنٹے سے زائد عرصہ گزر گیا ہے اور عوام کو قومی، سیاسی صورتحال کے حوالے سے حقائق جاننے میں شدید مشکلات کا سامنا کرنا پڑ رہا ہے۔ ”جیو نیوز“، ”جیو ٹی وی“، ”جیو سوپر“ اور ”آگ“ کی نشریات کی بندش نے عوام کو تازہ ترین خبروں، دلچسپ پروگراموں اور پاکستان و بھارت کی تاریخی کرکٹ سیریز سے محروم کر دیا ہے اور سیکڑوں لوگوں نے ڈش انٹینا خرید کر حالات سے آگاہی حاصل کی۔ لوگوں کی بڑی تعداد ایمرجینسی کے نفاذ اور چینلوں کی بندش کے فوری بعد سے ہی ٹی وی کے دفاتر میں ٹیلی فون کر کے اظہار یکجہتی کر رہی ہے۔ عوام کا یہ بھی کہنا تھا کہ ایمرجینسی کے نفاذ کے بعد سے تاحال سرکاری ٹی وی حالات و واقعات کی یکطرفہ تصویر دکھا رہا ہے جو غلط ہے۔ سرکاری ٹی وی کی خبروں کو دیکھ کر ایسا محسوس ہو رہا ہے جیسے ملک میں کچھ بھی نہیں ہو رہا۔ جیو ٹیلی ویژن نیٹ ورک کی بندش نے ناظرین کی بے چینی کو انتہائی حد تک بڑھا دیا ہے اور ان کا کہنا ہے کہ جیو نیوز نے ہمیں لمحہ بہ لمحہ حالات سے باخبر رہنے کا عادی بنا دیا ہے، اب موجودہ صورتحال میں ایسا لگ رہا ہے جیسے ہم ساری دنیا سے کٹ گئے ہیں۔ انہوں نے حکومت سے مطالبہ کیا ہے کہ جیو سمیت تمام چینل پر عائد پابندی فوری ختم کی جائے۔

__________________