پاکستانی بانڈز کا اجراء، ایک خطرناک سازش

القمر آن لائن
شاہد اکرم عباسی، الریاض


وطن عزیز پاکستان جو کہ گزشتہ 60برسوں سے آباد ہے اسے شاد کیوں نہیں ہونے دیا جا رہا یہ 1947ء سے دردناک المیہ رہا ہے کہ مفاد پرست طبقے نے اس کی جڑیں کھوکھلی کیں اور اسے اپنی بساط کے مطابق تباہ کیا۔ اس ملک میں لیاقت علی خان کے قتل سے لے کر آج تک بے انتہاء خطرناک اور دردناک واقعات گزر چکے ہیں۔ان سب کا ذمہ دار صرف صاحب اقتدار اور طاقتور طبقہ رہا ہے۔

اگر جائزہ لیا جائے کہ ان 60برسوں میں کس کس نے کیا کھویا اور کیا پایاتو معلوم ہو گا کہ غریب نے کھویا ہی کھویا ہے جبکہ امیر اور طاقتور نے پایا ہی پایا ہے۔ ان 60برسوں میں سے 33سال فوج کے غیر قانونی اور غیر اخلاقی جرنیلوں نے مل کر ملک کو تباہ و برباد کیا۔ انہوں نے ملک کو دو لخت کیا۔ ان ہی کے زمانے میں چرس، ہیروئین، کلاشنکوف، دہشت گردی، مہنگائی، سیاسی افراتفری، بم دھماکے، مظالم، نا انصافی، رشوت، کرپشن اور معیشت کی تباہی کے تحفے عوام کو حاصل ہوئے۔ ان لوگوں نے راتوں رات قانون پاس کئے، غریب عوام کو دھوکہ دیا اور اپنے مقاصد پورے کئے جبکہ بیرونی محاذوں پر ملکی راز کی حفاظت تک نہ کی اور وطن عزیز کو غیروں کے رحم و کرم پر چھوڑ کر مغرب زدہ کر کے مغرب کا غلام بنا ڈالا۔ بے حیائی کا وہ بازار گرم کیا جس کو رہتی دنیا تک یاد رکھا جائے گا۔

ماضی کی کچھ حکومتیں ناگفتہ بہ حالت میں ملک کو چلاتی رہیں جس کی مثال ایٹمی دھماکے کے بعد کس قدر پابندیاں لگیں۔ میاں صاحب کو ملک سے چلتا کیا اور چور دروازے سے غیر قانونی صدر پاکستان بن بیٹھے جن کا نام بھی اسلامی نہیں۔ پرویز ایک غیر اسلامی نام ہے اور اسے سعودی عرب اور کئی دیگر عرب ممالک میں اچھا نہیں سمجھا جاتا۔ ایسے نام والے کو سب سے پہلے اپنا نام تبدیل کرنے کو کہا جاتا ہے۔ جنرل پرویز مشرف نے جمہوری حکومت پر شب خون مارتے ہوئے عوامی قیادت کو چلتا کیا، جیلوں میں ڈالا اور باقی مفاد پرستوں کو وزارتوں، مشاورتوں کا لالچ دے کر ساتھ ملا لیا۔ سوال یہ ہے کہ کس کا پاکستان ہے؟ غریب کا۔ مجھے تو 16کروڑ میں سے ایک بھی غریب ایسا نہیں ملا جو یہ کہہ سکے کہ پاکستان میرا ہے۔یہ پاکستان جاگیرداروں، وڈیروں، چوہدریوں اور سرمایہ داروں کا ہے جو دونوں ہاتھوں سے ملک کو لوٹ رہے ہیں۔ یہ کس کا پاکستان ہے:

یہ تیرا پاکستان ہے نہ میرا پاکستان ہے یہ اس کا پاکستان ہے جو صدر پاکستان ہے
یہ غریب کے لہو کا پاکستان ہے۔ یہ امیر کی فیکٹریوں، ملوں، سرمائے والوں اور جاگیرداروں کا پاکستان ہے۔ظلم کی انتہاء ہے۔ کب وہ صبح آئے گی جب غریب بولے گا کہ یہ میرا اپنا پاکستان ہے۔ جب امیر کمزور اور غریب طاقتور ہو گا۔

مشرف صاحب نے آتے ہء پہلا کارنامہ یہ کیا کہ تمام لٹیروں، کرپٹ اور بالخصوص ہزاروں سنگین مقدمات میں ملوث مجرموں کو وزارتوں سے نوازا اور کئی ایک کو مشیربنا دیا حتی کہ قتل کے مقدمات میں ملوث کو گورنر اور وزارت اعلی عطا کیں۔ صرف مسلم لیگ (ن) کی دشمنی میں اور اپنے اقتدار کو طول اور طاقت بخشنے کے لئے ان لوگوں نے عوام کا پیسہ سمندر کے پانی کی طرح پیا، اس کے بعد آئین کی دھجیاں بکھیریں۔ 1973ء کے آئین کی اصل شکل بگاڑ کر رکھ دی، LFO اور 17ویں ترمیم سے وطن کو خطرناک صورتحال سے دوچار کر ڈالا حتی کہ ایک اور ایٹمی جنگ ہوتے ہوتے رک گئی۔ اگر عوامی حکومت ہوتی تو یوں کبھی بھی نہ ہوتا۔ ایم ایم اے نے بھی منفی اور مفاد پرست سیاسی طاقت ہونے کا ثبوت دیا۔ ان سب باتوں سے بڑھ کر یہ کہ ملک میں خطرناک حد تک مہنگائی کا تحفہ دیا۔ قیمتوں میں 200سے 400فیصد اضافہ ہوا، غریب کو غریب تر کر دیا اور غریب کی قوت خرید کو صفر سے بھی نیچے لے گئے۔ ملکی تاریخ کے 60برسوں میں اس سیاہ دور میں مہنگائی کا ریکارڈ اضافہ ہوا، چینی اور آٹے کے بحران بیشتر وزراء اور حکومتی مشیروں نے پیدا کئے لیکن کسی نے نہ پوچھا۔ دہشت گردی میں فرنٹ لائن اتحادی بنا کر ملک کو ذلیل و رسوا کیا اور انتہائی ذلیل طریقے سے امریکہ کے اتحادی بنے بلکہ یہ کہنا بجا ہو گا کہ پالتو سے بھی بڑھ کر ثبوت دیا جس کا خمیازہ پوری قوم بھگت رہی ہے۔
ملک کا امن و امان تباہ و برباد کر کے رکھ دیا۔ یہ اسی طرح ہے جیسے جہادیوں نے منشیات اور کلاشنکوف کلچر دیا۔ جب بھی کسی غیر ملکی طاقت (امریکہ) کا ساتھ دیا اس کے مفادات کو ترجیح دیتے ہوئے دیا جس کی وجہ سے وطن عزیز نے بے پناہ نقصانات کھائے۔ افغان جہاد اور پھر مشرف کی دہشت گردی کے خلاف لڑائی اس کے دو کھلے اور
سبق آموز ثبوت ہیں۔اپنے ملکی مفادات اور امن و امان کی بات نہ کی امریکہ سے کیوں نہ اس سے دُگنی قیمت وصول کی یعنی انڈیا سے بڑھ کر ہمارا وقار، بات اور اہمیت ہوتی اور امیکہ کو کہا جاتا کہ پاکستان کو بین الاقوامی ایٹمی کلب کا ممبر بنایا جائے اور پاکستان کو ایٹمی ملک کی حیثیت سے تسلیم کیا جائے۔ نیٹو، دولت مشترکہ، بین الاقوامی تنظیم تجارت World Trade Organization (WTO)، امریکہ اور اقوام متحدہ سے پیسوں کی بھیک کے بدلے تجارت کے کوٹے آئندہ 50سال کے لئے بڑھاتے تاکہ ملک سے بیروزگاری ختم ہوتی، آمدن 16ارب ڈالر سے زائد ہوتی، ملکی وقار بڑھتا، خوشحالی آتی، پیداوار( Production) بڑھتی ، برآمدات میں اضافہ ہوتا، ملک کو عالمی سطح پر وقار کے ساتھ جینے کا موقع فراہم ہوتا۔ لیکن معاملات اس کے برعکس ہوئے اور بیڈ ویئر، لائیو سٹاک اور انجینئرنگ کے شعبوں کی برآمدات میں 10تا 15فیصد کمی آئی جو مشرف کی منہ بولتی بے لاگ ناکامی کا ثبوت ہے کیونکہ اس جرنیل نے ایک سنہرا موقع گنوا دیا اور ملک کو ذلیل کر کے رکھ دیا۔

راقم ایک ایسے مسئلے کے بارے میں نشاندہی کر رہاہے جس کے بارے میں حیرانگی ہوتی ہے کہ کسی پارلیمنٹیرین نے اس کا کیوں کوئی نوٹس نہیں لیا۔ شوکت عزیز امپورٹڈ وزیر اعظم سٹی بنک کا سابقہ ایجنٹ ہے جو پاکستان کی تمام بین الاقوامی فنانشل Transactionsمیں سٹی بنک کو شامل کئے ہوئے ہے اور اس سے بڑھ کہ یہ کہ کروڑوں ڈالرز کے پاکستانی حکومتی بانڈز بین الاقوامی سطح پر جاری کر کے کمیشن کھا رہا ہے۔سٹی بنک کی مدد کرنا اور پھر ان بانڈز کو ایک سال سے 30سال تک کے لئے جاری کرانا۔ پھر آپ خود غور کریں کہ ان بانڈز کے بدلے آج سے 30سالوں تک بمع سود اور جو کرنسی میں کمی بیشی ہو گی اسے چھوڑ کر ان بانڈز کے کروڑوں ڈالرز، جو خطرناک قرضوں سے بھی بدتر ہوں گے، کو مستقبل کی کون سی حکومت اتارے گی۔ یہ ایک انتہائی خطرناک کھیل کیوں کھیلا جا رہا ہے۔ ان بانڈز کو فی الفور بند کر کے تمام رقوم ابھی لوٹائی جائں ورنہ مستقبل میں ملک کو مقروض ترین قرار دے کر تباہ کر دیا جائے گا۔ اس سازش کو بے نقاب ہونا چاہیے اور خدا را اس کے لئے سپریم کورٹ از خود نوٹس لیتے ہوئے بین الاقوامی بانڈز کی ہر قسم کی Transactionsکو فی الفور بند کر کے یہ کھیل کھیلنے والوں کے خلاف کارروائی کرے۔ اگر ایسا نہ ہوا اور ان ہاتھوں کو روکا نہ گیا تو آئندہ کے 5برسوں میں ملک مزید قرضوں کی دلدل میں دھنس چکا ہو گا۔ اس سے پہلے کہ پاکستان کی تاریخ ایک اور سیاہ باب کو دیکھے اس کھیل کو مکمل بے نیام اور بند کرنا ہو گا۔ بین الاقوامی بانڈز کے اجراء اور اس کے مکمل حقائق عوام کے سامنے لائے جائیں۔

اسی کے ساتھ جنرل مشرف ، ان کی بیگم، بیٹوں اور بیٹیوں، بہوؤں سمیت تمام قریبی رشتہ داروں کے اثاثہ جات کی مکمل چھان بین کی جائے اور یہ بھی کہ مشرف فیملی نے کرپشن میں کتنا مقام حاصل کیا ہے۔ مشرف حکومت نے جنرل کی وردی میں غیر قانونی صدارتی الیکشن دھونس اور دھاندلی بلکہ یوں کہنا غلط نہ ہو گا کہ پاکستان کے آئین کا حلیہ بگاڑنے والے صدارت کے منصب پر فائز ہونے کے لئے انتہائی غیر قانونی اور غلط طریقہ کار اختیار کر کے مستقبل کے پاک آرمی کے جرنیلوں کے لئے نئی راہ اور سمت متعین کی ہے اور اب ہر آنے والا آرمی جرنیل پہلے سے زیادہ ہمت اور حوصلے کے ساتھ جمہوریت کا جنازہ نکال سکے گا۔

__________________