پاکستانی حکومت صحافی تنظیموں کو نشانہ بنارہی ہے،سی پی جے



نیو یارک (جنگ نیوز) نیو یارک میں صحافیوں کے حقوق کی ایک عالمی تنظیم نے پاکستان میں صحافیوں کے خلاف ایف آئی آر کی مذمت کرتے ہوئے کہا ہے کہ حکومت خبر رساں اداروں کے بعد اب صحافی تنظیموں اور ان کے کارکنوں کو نشانہ بنا رہی ہے بلکہ سچائی قید کی جارہی ہے۔ نیویارک میں واقع صحافیوں کے حقوق کی عالمی تنظیم کمیٹی ٹو پروٹیکٹ جرنلسٹس کے مطابق پاکستان میں حکومت ٹی وی اور ریڈیو چینلز پر تو پہلے ہی پابندی لگا چکی ہے اب لگتا ہے کہ وہ صحافی تنظیموں اور عام صحافیوں کو ایک ایک کر کے نشانہ بنانے کی تیاری کر رہی ہے۔ 29 نومبر کو پاکستان فیڈرل یونین آف جرنلسٹس اور راولپنڈی، اسلام آباد یونین آف جرنلسٹس کے خلاف درج کی گئی ایف آئی آر کی مذمت کرتے ہوئے سی پی جے کے ایشیا پروگرام کے ڈائریکٹر باب ڈیٹز نے کہا یہ واضح ہے کہ یہ حکومت کی طرف سے پی ایف یو جے کو ہراساں کرنے اورحق کی آواز بند کروانے کی ایک کوشش ہے، ہمیں تو یہ لگ رہا ہے کہ حکومت ایک ایک کر کے ایسے اقدامات کر رہی ہے جن سے اسے پاکستان میں صحافیوں کو نشانہ بنانے میں مدد ملے۔ راولپنڈی میں آبپارہ کے علاقے میں 29 نومبر کو درج کی گئی ایک ایف آئی آر میں الزام ہے کہ پی ایف یو جے اور راولپنڈی اسلام آباد یونین آف جرنلسٹس نے 14 نومبر کو ایک مزاحمتی کیمپ میں ایسے پمفلٹ تقسیم کئے جن میں حکومت کے خلاف ہتک آمیز الفاظ استعمال کئے گئے تھے۔ پی ایف یو جے نے اپنی ویب سائٹ پر اس الزام کی تردید کی ہے اور کہا ہے کہ ایسے کسی پمفلٹ سے ان کی تنظیم یا کسی بھی صحافی تنظیم کا کوئی تعلق نہیں۔ میڈیا سے بات چیت کرتے ہوئے باب ڈیٹز نے کہا کہ گذشتہ جمعہ کو حکومت پاکستان کا ایک وفد ان سے ملنے آیا تھا لیکن وفد سے بات کر کے انہیں ایسا لگا کہ حکومت کو احساس ہی نہیں ہے کہ وہ آزادیٴ اظہار کے خلاف کتنا آگے جا چکی ہے۔ ڈیٹز کے مطابق ایسا ہی ایک وفد 1999ء میں بھی امریکہ بھیجا گیا تھا۔ حکومت نے مشرف کے اقتدار سنبھالنے کے ایک مہینے بعد ہی یہ وفد بھیجا اور وہ بھی ہمیں ایسی ہی باتیں بتا رہے تھے کہ یہ سب تھوڑے ہی وقت کیلئے ہے اور ہم جلد جمہوریت دوبارہ بحال کرد یں گے اور ہم نے اس وقت بھی انہیں یہی کہا تھا کہ ایسا نہیں ہوگا، ہم صحیح نکلے اور مجھے جمعہ کو بالکل 99ء جیسا ہی احساس ہو رہا تھا۔