پاکستانی خاتون کی دنیا کی بلند ترین سے چھلانگ

بی بی سی رپورٹ

پاکستان سے تعلق رکھنے والی خاتون نمیرا سلیم نے دنیا کی بلند ترین چوٹی ماونٹ ایورسٹ یا کوہ ہمالیہ سے زیادہ بلندی سے زمین پر چھلانگ لگانے والے پہلے ایشیائی کا اعزاز حاصل کر لیا ہے۔
’ایک لمحے کے لیے مجھ یوں محسوس ہوا جیسے میں ہوا میں معلق ہوں‘ نیمرا سلیم نے کامیاب چھلانگ لگانے کے بعد نیپال سے اپنے پہلے انٹرویو میں بی بی سی اردو سروس کے نمائندے شفیع نقی جامعی سے بات کرتے ہوئے کہا۔

نمیرا سلیم اس سے قبل قطب شمالی اور قطب جنوبی پر جانے والے پہلے پاکستانی کا اعزاز بھی حاصل کر چکی ہیں۔ انہوں نے کہا کہ وہ اپریل دو ہزار سات میں قطب شمالی پر گئی تھیں اور جنوری دو ہزار آٹھ میں انہوں نے قطب جنوبی پر قدم رکھنے والے پہلے پاکستانی کا اعزاز حاصل کیا۔

نمیرا سلیم خلاء میں جانے کا ارادہ بھی رکھتی ہیں اور انہوں نے اس سلسلے میں خلاء میں سیاحوں کو لے جانے والے منصوبے میں اپنا نام درج کروا رکھا ہے۔

انہوں نے کہا کہ وہ پہلی ایشیائی خاتون نہیں بلکہ ایشیاء سے تعلق رکھنے والی پہلی فرد ہیں جس نے ماونٹ ایورسٹ سے زیادہ اونچائی سے چھلانگ لگانے کا اعزاز حاصل کیا ہے۔

ماونٹ ایورسٹ سے زیادہ بلندی پر جا کر ’اسکائی ڈائو‘ کرتے ہوئے اپنے احساسات بیان کرتے ہوئے نمیرا نے کہا کہ پہلے ایک منٹ کی ’فری فال‘ تھی یعنی جہاز سے چھلانگ لگانے کے ایک منٹ بعد پیراشوٹ کھولنا تھا۔ انہوں نے کہا اس ایک منٹ میں تو انہیں کوئی خوف یا ڈر محسوس نہیں ہوا اور ایسا لگ رہا تھا جیسے ہو نہ نیچے جا رہی ہوں نہ اوپر بس ہوا میں معلق ہوں۔

نمیرا نے کہا کہ انہوں نے یہ چھلانگ انتیس ہزار چار سو اسی فٹ کی بلندی سے لگائی۔

نمیرا نے اس چھلانگ کے لیے اپنی تربیت اور تیاری کے حوالے سے ایک سوال کے جواب میں کہا کہ یہ ’سولو‘ یا تنہا چھلانگ نہیں تھی اور ان کے ساتھ ایک ’انسٹرکٹر‘ موجود تھا۔

انہوں نے کہا کہ اس کے لیے کوئی بہت زیادہ تربیت کی ضرورت نہیں پڑی تاہم انہوں نے کچھ ہفتے جسمانی ورزش کی تھی۔ انہوں نے کہا کہ اس چھلانگ کے لیے دس تک اس علاقے میں ٹریکنگ اور تیاری کی گئی۔

نمیرا نے کہا کہ ماونٹ ایورسٹ جسے دنیا کی چھت یا تیسرا پول بھی کہا جاتا ہے اسے سر کرنا بہت سے لوگوں کی طرح ان کا بھی خواب تھا۔ انہوں نے کہا کہ وہ یہ تو حاصل نہ کر پائیں لیکن جب یہ ماونٹ سے بلندی پر جا کر اسکائی ڈائونگ کا منصوبہ آیا تو انہوں نے اس میں شامل ہونے کا فیصلہ کر لیا۔

نمیرا نے کہا کہ اس میں ان کے والدین کی مرضی شامل نہیں تھی اور انہوں نے اپنی مرضی کی۔

ماؤنٹ ایورسٹ کے اوپر سے چھلانگ لگانے کے لیے ناصرف خصوصی سوٹ یا لباس درکار تھے بلکے ہوا کی کسافت کم ہونے کی وجہ سے پیرا شوٹ بھی خصوصی طور پر تیار کیئے گئے تھے۔

اتنی زیادہ اونچائی پر انتہائی کم درج حرارت میں سلامت رہنے کے لیے چھلانگ لگانے والوں کو خصوصی لباس پہنایا گیا۔

زمین پر موجود لوگوں کے مطابق اتنی اونچائی پر یہ لوگ ہوا میں اڑتے ہوئے چھوٹے چھوٹے پرندوں کی طرح دکھائی دے رہے تھے۔