اسلام آباد ... صدر پرویز مشرف نے کہا ہے کہ پاکستانی علاقے میں اتحادی افواج نے کارروائی کی تواسے حملہ تصور کیا جائے گا،تاہم اگر آئندہ منتخب حکومت نے ان کے مواخذے کی کوشش کی تو وہ اپنا عہدہ چھوڑدیں گے۔سنگاپور کے روزنامے کو انٹرویو میں صدر پرویز مشرف نے کہا کہ پاکستانی علاقہ میں انتہاپسندوں کے خلاف کارروائی ملکی خودمختاری کی خلاف ورزی ہوگی، جس کی بھرپور مزاحمت کی جائے گی۔انہوں نے کہا کہ میں پاکستانی پہاڑی علاقوں میں آنے والوں کو چیلنج کرتا ہوں کہ وہ اس دن پر پچھتائیں گے۔صدر پرویز نے امریکی صدارتی امیدوار ہلیری کلنٹن کی جانب سے پاکستان کے ایٹمی اثاثوں کی عالمی نگرانی کی تجویز کو ملک کے اندرونی اور حساس معاملات میں مداخلت قرار دیا۔ان کا کہنا تھا کہ شاید وہ سمجھ نہیں پائیں کہ پاکستان کے ایٹمی اثاثوں کی نگرانی کا کس قدر مضبوط نظام موجود ہے۔اس سوال پر کہ پیپلز پارٹی نے آئندہ انتخابات جیتنے کے بعد مسلم لیگ نواز شریف کے ساتھ مل کر ان کے خلاف مواخذہ کی تحریک پیش کی تو ان کا کیا ردعمل ہوگا، صدر پرویز مشرف نے کہا کہ اگر آئندہ حکومت نے مفاہمت کے ساتھ آگے بڑھنے کا رویہ نا اپنایا تو وہ اپنا عہدہ چھوڑنے کو ترجیح دیں گے۔