سری نگر (آن لائن) مقبوضہ کشمیر میں بھی پاکستان کا یوم آزادی اس عزم اور جوش و خروش کے ساتھ منایا گیا کہ بھارت سے آزادی اور کشمیر کا پاکستان کے الحاق تک جدوجہد آزادی جاری رکھی جائے گی۔ پاکستان کے حامی آزادی کے موقع پر سری نگر سمیت ریاست کے مختلف مقامات پر تقاریب کا انعقاد کیا گیا ہے جن میں مقررین نے پاکستان کے یوم آزادی کے تاریخی پس منظر پر روشنی ڈالی۔ مجاہدین نے اپنی خفیہ کمین گاہوں پر مسلح پریڈوں میں سبز ہلالی پرچم کو سلامی دی۔ اس موقع پر تحریک آزادی کشمیر میں نمایاں خدمات انجام دینے والے مجاہدین کو اعزازات سے بھی نوازا گیا۔ سری نگر میں جموں کشمیر ماس موومنٹ کے مرکزی دفتر پر ایک خصوصی تقریب ہوئی جس میں کل جماعتی حریت کانفرنس کے کئی رہنماؤں سمیت بڑی تعداد میں لوگوں نے شرکت کی۔ اس موقع پر تقریب سے خطاب کرتے ہوئے جموں کشمیر ماس موومنٹ کی سربراہ اور کل جماعتی حریت کانفرنس کی سینئر رہنماء فریدہ بہن جی نے پاکستانی عوام کو ساٹھویں جشن آزادی پر مبارکباد پیش کرتے ہوئے کہا کہ کشمیری عوام پاکستانی قوم کا ان کی اخلاقی اور سیاسی حمایت جاری رکھنے پر شکرگزار ہیں ۔انہوں نے کہا کہ کشمیری عوام کا جشن اس روز ہوگا جب کشمیر بھارت کے تسلط سے آزاد ہوکر اس کا الحاق پاکستان سے ہوجاتا ہے ۔انہوں نے کشمیریوں کے اس عزم کو دہرایا کہ کشمیر سے بھارت کے غاصبانہ تسلط کے خاتمے اور اس کا پاکستان سے الحاق تک جدوجہد آزادی جاری رکھی جائے گی۔ پاکستان کی یوم آزادی کے موقع پر سری نگر سمیت ریاست طول و عرض میں سبزہلالی پرچم لہرائے گئے۔ تاہم بھارتی فوج نے صبح سویرے ہی سے ان کو اتارنا شروع کردیا تھا۔ اس دوران کئی افراد بھی گرفتار کرلئے گئے۔

__________________