نیو یارک (جنگ نیوز) اقوام متحدہ کے ادارے برائے پناہ گزین نے پاکستان کو دنیا کے150 ممالک میں سے سب سے زیادہ مہمان نواز ملک قرار دیا ہے، جس نے تقریباً 20 لاکھ افغانیوں کو اپنی سرزمین پر پناہ دے رکھی ہے۔پناہ گزینوں کے عالمی دن کے موقع پر جاری ہونے والے ایک بیان میں اقوام متحدہ کے ادارے برائے پناہ گزین کا کہنا ہے کہ پاکستان نے گزشتہ تین دھائیوں سے مہاجرین بالخصوص افغانیوں کی میزبانی کر کے پوری دنیا میں مہمان نوازی کی ایک عظیم مثال قائم کردی ہے۔ بیان کے مطابق ادارے نے سال 2007 میں 150ممالک کا جو سروے کیا تھا اس میں پاکستان پناہ گزینوں کی میزبانی کرنے والوں میں سر فہرست تھا جس نے آج بھی افغانیوں کو اپنی زمین پر پناہ دے رکھی ہے۔ اقوام متحدہ کا کہنا ہے کہ صوبہ سرحد اور بلوچستان کے وہ اضلاع انتہائی پسماندہ ہیں جہاں پر افغان پناہ گزینوں نے گزشتہ تین دہائیوں میں قیام کیا کیونکہ ان کی موجودگی کی وجہ سے مقامی وسائل پر اثر پڑا ہے۔ادارے کا کہنا ہے کہ عراق میں جاری تشدد کی وجہ سے پناہ گزین اور بے گھر ہونے والے افراد کی تعداد9.9 ملین سے بڑھ کر11.4 ملین ہوگئی ہے جبکہ بے گھر ہونے والے افراد، پناہ گزین اپنے وطن لوٹنے والے افراد کو ملا کر اقوام متحدہ اس وقت 31.4 ملین افراد کی دیکھ بھال کر رہی ہے۔ پاکستان سے 2002 سے افغانیوں کی رضاکارانہ طور پر وطن واپسی کے پروگرام کے تحت3.3 ملین افراد کی واپسی کے باوجود ملک میں افغان پناہ گزینوں کے 84 کیمپوں میں اور باہر تقریباً دو لاکھ افراد رہائش پذیر ہیں۔