پاکستان دنیا کے 180 ممالک میں ‘ 46 واں کرپٹ ترین ملک
کراچی (رپورٹ ۔ پاک نیٹ) ٹرانسپیرنسی انٹرنیشنل پاکستان کے چیئرمین سید عادل گیلانی نے ٹرانسپیرنسی انٹرنیشنل کی جانب سے دنیا بھر کے مختلف ممالک کی کرپشن مشاہداتی انڈیکس 2008ء جاری کرتے ہوئے پاکستان کو دنیا کے 180 ممالک میں سے 46 واں کرپٹ ترین ملک قرار دیا ہے اور کہا ہے کہ اگر پاکستان میں بدعنوانی کی بڑھتی ہوئی شرح کو نہ روکا گیا تو پاکستان کا وجود بھی برقرار نہیں رہ سکے گا ۔ یہ بات انہوں نے منگل کو کراچی پریس کلب میں ٹرانسپیرنسی انٹرنیشنل کی کرپشن مشاہداتی انڈیکس 2008 کے اجراء کے سلسلے میں منعقدہ پریس کانفرنس سے خطاب کرتے ہوئے کہی ۔ سید عادل گیلانی نے رپورٹ پیش کرتے ہوئے کہا کہ صومالیہ اور عراق دنیا کے کرپٹ ترین ممالک میں پہلے نمبر پر ہیںجب کہ ڈنمارک ،نیوزی لینڈ ، سوڈان اور سنگا پور میں بد عنوانی کی شرح بہت ذیادہ کم ہے ۔اسی طرح بلغاریہ ، برونڈی ، مالدیپ ، ناروے اور برطانیہ میں بدعنوانی کی شرح میں اضافہ ہو اہے اس کے علاوہ البانیہ ، یونان ، جارجیا ، مارشیس ، نائجیریا ، امان ، قطر ، جنوبی کوریا ، ٹونگہ اور ترکی میں بد عنوانی کی شرح میںکمی واقع ہوئی ہے ۔ رپورٹ کے مطابق پاکستان جنوبی ایشیا ء میں عراق کے بعد سب سے زیادہ کرپٹ ترین ملک ہے جب کہ دنیا میں 180 ممالک میں سے پاکستان 46 ویں نمبر پر کرپٹ ممالک میں شمار کیا گیا ہے ۔ پاکستان کے مدمقابل بھارت 85 ویں نمبر پر ہے جس کے مطابق بھارت میں بد عنوانی شرح 1998 کے مقابلے میںکافی حد تک کم ہے ۔ انہوںنے کہا کے رپورٹ میں اس بات کی نشاندہی کی گئی ہے کہ جس ملک میں جتنی زیادہ بد عنوانی کم ہو گی اس ملک میں معیشت اتنی زیادہ بہترہو گی ۔انہوں نے کہا کہ پاکستان کے غیر ملکی ذخائر میں کمی واقع ہونا اور تجارتی خسارہ کا بڑھنا موجودہ حکمرانوں کے لئے باعث تشویش ہونا چاہیے تاہم صورتحال اس کے برعکس ہے ۔انہوں نے بتایا کہ پاکستان میں گزشتہ 61 سالوں کے دوران سب سے زیادہ بد عنوانی نواز شریف کے آخری دور حکومت میں تھی ۔انہوں ورلڈ بینک کی رپورٹ کا حوالہ دیتے ہوئے کہا کہ پاکستان کی ترقی کی راہ میں سب سے بڑی رکاوٹ بد عنوانی ہے جس کے خاتمے کے لئے ضروری ہے کہ ہم سب شہری اور دفاعی محکموں بشمول نجکاری کے عمل میں اچھی حکمرانی ، سیاسی عزم ، عدلیہ کی آزادی اور غیر امتیازی احتساب کے طریقہ عمل پر کار بند ہوں اور معاشی مسائل پر مکمل بھر پور توجہ دیں اس سلسلے میں بینک کی شرح سود میں ترامیم ، توانائی اور ایندھن کے انتظامات کو رواں کرنا اور محصولات کی شرحوں کو منتقل و معقول بنانے کے ساتھ ساتھ ریگولیٹری اتھارٹیز ایس ای سی پی ،پی پی آر اے ، ای پی اے ، ایس بی پی ، پیمرا ، اوگرا، ٹی پی اے ، پیفرا وغیرہ کے نظام کو شفاف بنانا ہو گا تا کہ سرمایہ کاروںکا اعتماد بحال ہو سکے اور ملک میں ذیادہ سے زیادہ سرمایہ کاری ممکن ہو جس سے بے روز گاری اور غربت کی شرح میں کمی واقع ہو سکے ۔