نئی دہلی ۔۔۔۔۔۔۔ بھارت کے وزیر مملکت برائے تجارت جے رام رامیش نے اپنی حکومت کو تجویز دی ہے کہ بنگلہ دیش اور سری لنکا کی طرح پاکستان سے بھی براہ راست غیر ملکی سرمایہ کاری کی اجازت ہونی چاہئے۔ اتوار کو یہاں سارک چیمبرز آف کامرس اینڈ انڈسٹری کے اجلاس سے خطاب کرتے ہوئے انہوں نے کہا کہ اب فارن انوسٹمنٹ پروموشن بورڈ کے ذریعے بنگلہ دیش سے براہ راست غیر ملکی سرمایہ کاری کی اجازت ہو گی۔ صرف پاکستان ہی سارک کا واحد ملک ہے جو ابھی تک نیگیٹو لسٹ میں شامل ہے اور میری خواہش ہے کہ پاکستان کو بھی جلد سے جلد اس لسٹ سے نکالا جائے۔ انہوں نے اس یقین کا اظہار کیا کہ بھارت کو پاکستان سے براہ راست غیر ملکی سرمایہ کاری پر عائد پابندیاں ختم کرنے کا اشارہ دینے کی ضرورت ہے۔ بھارتی وزیر نے کہا کہ اگرچہ سافٹا صرف تجارت تک محدود ہے، سارک ممالک کو تجارت سے آگے بڑھ کر سرمایہ کاری اور خدمات کے شعبے پر بھی نظر رکھنی چاہئے۔ مجھے امید ہے کہ ہم 2008ء میں سرمایہ کاری اور سروسز کے متعلق بات چیت کا عمل شروع کر سکیں گے۔ سارک چیمبرز کے اجلاس میں پاکستان کے طارق سعید نے سارک چیمبر آف کامرس اینڈ انڈسٹری کے نئے سربراہ کا منصب سنبھالا، پاکستان کو کئی برسوں کے وقفے کے بعد سارک چیمبر آف کامرس انڈسٹری کی صدارت حاصل ہوئی ہے۔