وزیر داخلہ نے کہا کہ ملک ہر خطرے سے نمٹنے کو تیار ہے اور یہ تیاری ہر روز، ہر ہفتے اور ہر مہینے مضبوط ہو رہی ہے

ہندوستان کے وزیر داخلہ پی چدامبرم نے کہا ہے کہ پاکستان میں موجود بعض شدت پسند گروپ بھارت ميں دہشت اور افراتفری پھیلانے کی نیت سے دراندازی کرنے کی تیاری کر رہے ہیں۔

خبر رساں ادارے پی ٹی آئی کو ایک انٹرویو میں پی چدامبرم نے پاکستان کے موجودہ حالات پر تشویش ظاہر کرتے ہوئے کہا ہے کہ ’مجھے پاکستان کے لیےافسوس ہے، پشاور ہو یا پھر راولپنڈی یا اسلام آباد طالبان جہاں چاہے وہاں حملے کر سکتے ہیں۔‘

انہوں نے یہ بھی کہا کہ اگر انہيں روکا نہيں جاتا ہے تو یہ خطرہ پورے جنوبی ایشیاء ميں پھیل سکتا ہے۔

پی چدامبرم نے کہا ہے کہ لشکر طیبہ ، جیش محمد اور حزب المجاہدین جیسی تنظیمیں افرا تفری پھیلانے کے مقصد سے بھارت میں دراندازي کرنے کی تیاری کر رہی ہیں۔ ان کا کہنا تھاکہ ’خفیہ معلومات کے مطابق یہ تنظیمیں دراندازی کی کوشش کر رہی ہیں اور ظاہر ہے کہ وہ سیاحت کے مقصد سے نہیں آرہے ہیں۔‘

وزیر داخلہ نے کہا کہ ملک ہر خطرے سے نمٹنے کو تیار ہے اور یہ تیاری ہر روز، ہر ہفتے اور ہر مہینے مضبوط ہو رہی ہے۔ ان کا کہنا ہے کہ خطرہ اگر باہر سے ہو تو کسی بھی ملک کو اپنے ہی ملک کی سکیورٹی سخت کرنی ہوتی ہے اور بھارت وہی کر رہا ہے۔

چدامبرم کا کہنا ہے کہ پاکستان ممبئی حملوں کے ذمےدار لوگوں کو سزا دلانے کا کوئی ارادہ نہیں رکھتا ہے۔ انہوں نے یہ بھی کہا کہ پہلے بھی انہیں پاکستان کے ارادے پر شک تھا اور ابھی بھی ہے۔

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــ
بی بی سی۔