واشنگٹن (جنگ نیوز) پاکستان سے وکلا اور معطل ججوں کی حمایت پر ڈی پورٹ ہو کر آنے والے امریکی سول سوسائٹی کے دو کارکنوں میں سے ایک کو امریکی سینیٹ میں پاکستان کی صورتحال پر احتجاج کرنے پر حراست میں لے لیا گیا۔ یہ بات ڈی پورٹ ہو کر آنے والے والی امریکی سول سوسائٹی کی کارکن میڈیا بنجمن نے میڈیا کو پاکستان کے دورے کے بارے میں تاثرات ریکارڈ کرواتے ہوئے بتایا جنگ مخالف امریکی تنظیم، کوڈپنک، کے دو کارکن بیری اور بنجمن پاکستان سے ڈی پورٹ ہو کر نیویارک پہنچے تھے جہاں سے فوراً وہ امریکی دارالحکومت واشنگٹن ڈی سی روانہ ہوئے تھے جہاں امریکی سینیٹ میں پاکستان کو امریکی امداد پر بحث ہو رہی تھی۔ میڈیا بنجمن نے واشنگٹن ڈی سی سے ٹیلیفون پر بتایا کہ جس وقت امریکی انتظامیہ کا نمائندہ کانگریس میں پاکستان حکومت کی طرف سے جمہوریت کی بحالی کے لیے اقدامات کا دعویٰ کر رہا تھا تو مسٹر بیری نے احتجاج کیا جس پر انہیں گرفتار کر لیا گیا۔ ان کا کہنا تھا کہ پاکستانی پولیس اور حکومت پاکستانی شہریوں، وکلا اور ججوں سے بدترانداز میں پیش آ رہی ہے۔

__________________