لاہور ۔۔۔۔۔۔۔ پاکستان مسلم لیگ کے مرکزی رہنما اور سابق وزیر اعلیٰ پنجاب چوہدری پرویز الٰہی نے کہا ہے کہ پاکستان مسلم لیگ ایک نظریاتی جماعت ہے جو قائداعظم کے ارشادات و افکار کے مطابق ملک کو ایک ایسی فلاحی ریاست بنانے کا عزم رکھتی ہے جہاں ہر شہری کو ان کے حقوق حاصل ہوں اور ان کے مسائل حل کئے جائیں۔عوام کو بتایا جائے کہ (ن) لیگ والے زرداری اینڈ کمپنی کی ذیلی شاخ بن چکے ہیں انہیں مسلم لیگی کہلانے کا کوئی حق نہیں۔ وہ اتوار کو اپنی رہائش گاہ پر شیخوپورہ اور ننکانہ کے اضلاع سے آئے ہوئے قومی و صوبائی اسمبلی کے مسلم لیگی امیدواروں سے خطاب کر رہے تھے۔ چوہدری پرویزالٰہی نے کہا کہ پاکستان مسلم لیگ نے بیشمار ترقیاتی کام کئے ہیں اور ملک کو تعمیر و ترقی کی راہ پر گامزن کر دیا ہے۔ میں آپ کو کامیابی کی پیشگی مبارکباد دیتا ہوں کہ انشاء اللہ پاکستان مسلم لیگ ملک بھر میں کلین سویپ کرے گی۔ قومی اسمبلی کے ارکان بریگیڈیئر (ر) ذوالفقار احمد ڈھلوں‘ شاہد منظور گِل‘ محمد سعید ورک‘ میاں شمیم احمد‘ سردار افتخار احمد ڈوگر اور آغا علی حیدر ودیگر نے شرکت کی۔ امیدواروں کا خیرمقدم کرتے ہوئے چوہدری پرویزالٰہی نے کہا کہ ہم نے صوبے بھر میں تعمیر و ترقی کا جال بچھا دیا ہے اور مجھے یقین ہے کہ اپنی پانچ سالہ کارکردگی کی بنیاد پر مسلم لیگ بھاری اکثریت سے کامیاب ہوگی۔ جبکہ ہمارے مقابلے میں ماضی میں برسراقتدار رہنے والوں نے کوئی قابل ذکر کام نہیں کئے۔ انہوں نے امیدواروں سے کہا کہ وہ اس بات کو ذہن میں رکھیں کہ (ن) لیگ کے ووٹ نظریاتی ووٹ ہیں اور وہ مسلم لیگ کو ملیں گے کیونکہ (ن) لیگ والے تو پیپلز پارٹی سے مل گئے ہیں۔انہوں نے امیدواروں سے کہا کہ وہ عوام کو بتائیں کہ (ن) والے زرداری اینڈ کمپنی کی ذیلی شاخ بن چکے ہیں انہیں مسلم لیگی کہنے کا کوئی حق نہیں۔ انہوں نے کہا کہ یہ بات آپ ذہن میں رکھیں کہ ہم وطن کی حفاظت وطن کی ترقی کا عزم لے کر آئیں ہیں اس لئے آپس کی ناراضگیاں‘ چھوٹے موٹے جھگڑے فوری طور پر دور کر کے اور ذات سے بلند ہو کر ہمیں آگے آنا ہو گا۔