کراچی(ثناء نیوز)آغا خان یونیورسٹی کے ڈویژن آف ویمن اینڈ چائلڈ کے بانی اور سربراہ ڈاکٹر ذوالفقار بھٹہ نے کہا ہے کہ پاکستان میں پیدا ہونے والے ہر 1000بچوں میں سے 47 مردہ پیدا ہوتے ہیں۔دنیا بھر میں میں روزانہ 7 ہزار بچے مردہ پیدا ہوتے ہیں۔ 10 موثر تدابیر سے نوزائیدہ اموات کا تناسب نصف کیا جاسکتا ہے۔یہ حقائق آغا خان یونیورسٹی کے ڈویژن آف ویمن اینڈ چائلڈ کے بانی اور سربراہ ڈاکٹر ذوالفقار بھٹہ کے تیسرے مقالے میں بیان کئے ہیں۔ڈاکٹر ذوالفقار بھٹہ نے بتایا کہ 26 لاکھ سے زائد بچے ہر سال پیدائش سے قبل ہی ہلاک ہوجاتے ہیں تاہم ایسی 10 موثر تدابیر موجود ہیں جن کی مدد سے نازائیدہ بچوں کی اموات میں کمی کی جاسکتی ہے۔ دی لینسیٹ نے نازائیدہ بچوں کی اموات کے حوالے سے ایک تحقیقاتی سیریز عوام کی آگاہی کے لیے پیش کی جس کے مطابق اگر 99 فیصد حاملہ خواتین پر ان 10 تدابیر کا اطلاق کیا جائے تو کم اور درمیانی آمدنی والے ممالک میں نازائیدہ بچوں کی اموات کی شرح تقریباً نصف ہوسکتی ہے۔ نازائیدہ بچے کی موت والدین اور اہل خانہ کے لیے شدید صدمے کا باعث ہوتی ہے۔ اگر ضروری اقدامات کیے جائیں تو 2020 تک ایسے واقعات کی تعدادتقریباً نصف ہو سکتی ہے۔ عالمی صحت کے ادارے کے جائزے کے اعدادوشمار کے مطابق دنیا بھر میں ہونے والی ایسی اموات کے دوتہائی واقعات محض 10 ممالک یعنی بھارت، پاکستان، نائیجیریا، چین، بنگلہ دیش، عوامی جمہوریہ کونگو، ایتھوپیا، انڈونیشیا، افغانستان اور تنزانیہ میں ہوتے ہیں۔ ممالک کی یہ فہرست بالترتیب سب سے زیادہ اموات سے سب سے کم اموات کی جانب اشارہ کرتی ہے۔ دنیا بھر میں نازائیدہ بچوں کی اموات کے تقریباً نصف واقعات اس فہرست کے پہلے پانچ ممالک میں پیش آتے ہیں۔ پاکستان میں پیدا ہونے والے ہر 1000بچوں میں سے 47 مردہ پیدا ہوتے ہیں جس کے مقابلے میں فن لینڈ میں یہ تعداد 2 جبکہ عالمی سطح پر 19 ہے۔دنیا بھر میں نازائیدہ بچوں کی اموات کے تقریباً دوتہائی واقعات دیہی علاقوں میں پیش آتے ہیں جہاں شہری علاقوں کے مقابلے میں تربیت یافتہ طبی عملے کی تعداد تقریباً 50 فیصد ہے اور بذریعہ آپریشن زچگی کی سہولت عام طور پر دستیاب نہیں۔تاہم بہت سے ترقی پذیر ممالک میں نازائیدہ بچوں کی اموات کی شرح میں خاطر خواہ کمی ہوئی ہے۔ کولمبیا، چین، میکسیکو اور ارجنٹائن میں ان واقعات میں 40 سے50 فیصد تک کمی واقع ہوئی ہے۔ ’کاؤنٹ ڈاؤن ٹو 2015 ‘ نامی جائزہ شروع کیا گیا جس کے مطابق اگر 68 ترجیحی ممالک میں مجوزہ 10 تدابیر اختیار کی جائیں تو نازائیدہ بچوں کی اموات میں 45 فیصد تک کمی ہوجائے گی۔ ان تدابیر میں دوران حمل بنیادی دیکھ بھال؛ ملیریا سے تحفظ کے لیے ایسی مچھر دانیوں کی فراہمی جن میں حشرات سے بچاؤ کی دوا لگی ہوئی ہو۔ فولک ایسڈ کی اضافی خوراک اور دوران حمل ذیابیطس سے تحفظ وغیرہ شامل ہیں جن کی مدد سے تقریباً 1.1 ملین اموات کو روکا جاسکتا ہے۔
Print This Post

__________________
لا فتی الا علیّ لا سیف الاّ ذوالفقار