پشاور۔پاکستان میں کسی مسلح جدوجہد کی حمایت نہیں کرتے مفتی محمود نے آئین اور قانون کے دائرے میں رہ کر اسلامی نظام کے نفاذ کے لئے جدوجہدکی جسے جاری رکھیں گے امریکہ کی جانب سے پاکستان کو دی جانے والی دھمکیاں تشویشناک ہیں اگر حکمران پارلیمنٹ کی قرار داد اور آل پارٹیز کانفرنس کے فیصلوں پر عملدرآمد کرتی تو آج یہ دن نہ دیکھنا پڑتے۔ان خیالات کا اظہارجمعیت علماء اسلام کے مرکزی امیر مولانا فضل الرحمن نے پشاور میں منعقدہ مفتی محمود کانفرنس سے خطاب کرتے ہوئے کیا۔انہوں نے کہاکہ اسلام کے علاوہ کوئی نظام قبول نہیں مفتی محمود نے آئین کے دائرے میں رہ کر اسلامی نظام کی خاطر جدوجہد کی ناکہ مسلح جدوجہد کی حمایت کی۔

انہوں نے کہاکہ پاکستان میں غیر مسلح جدوجہد کی بھرپور حمایت کرتے ہیں اور اسی آئینی اور جمہوری راستے کو اپنا کر ملک میں اسلامی انقلاب برپا کریں گے۔انہوں نے کہاکہ موجودہ حالات میں جمعیت علماء اسلام نا صرف پاکستان بلکہ عالم اسلام میں علماء کا بہت بڑا فارم ہے افغانستان میں افغانستان کی بقاء اور آزادی کیلئے طالبان کی جدوجہد کی حمایت کرتے ہیں اور اسے جائز دفاع قرار دیتے ہیں انہوں نے کہاکہ مفتی محمود نے بھی اپنے وقت میں افغانستان میں استعماری قوتوں کے خلاف مجاہدین کی جدوجہد کو جائز دفاع قرار دیا۔

انہوں نے کہاکہ پاکستان میں طالبان کے نام پر کوئی تنظیم نہیں مولانا حسن جان سمیت ملک کے جید علماء کو قتل کرنے والے اور میرے سمیت دیگر علماء پر حملے کروانے والوں کو مجاہد نہیں کہہ سکتے ۔نہ ہی ہمارے علماء کا ان کے ساتھ تعلق ہے۔انہوں نے کہاکہ حقانی نیٹ ورک کے حوالے سے پاکستان کو امریکی دھمکیاں کی شدیدمذمت کرتے ہیں اگر پارلیمنٹ کی مشترکہ قرار داد اور اے پی سی کے اعلامے پر من و عن عمل کیا جاتا توآج یہ دن نہ دیکھنا پڑتا۔انہوں نے کہاکہ ہمارے نام نہاد پختونخوں کے عالم بردار لیڈروں پر میں حیران ہو کہ اپنے دفاع یاملکی مفاد کی خاطر کسی پہاڑ پر بھی بندوق اٹھانے والے کو دہشت گرد کہتے ہیں جبکہ ڈھول بجانے والے کو پختون کہتے ہیں انہوں نے کہاکہ سرمایہ دارانہ نظام سے ملک سے چھٹکارا دلائیں گے اور ملک میں حقیقی معنوں میں اسلام نظام اور عدل کا نظام قائم کریں گے۔پاکستان میں کسی مسلح جدوجہد کی حمایت نہیں کرتے ، فضل الرحمن - AAJ