پاکستان میں گزشتہ چند ماہ کے دوران امریکی سینٹ ڈیپارٹمنٹ اورپینٹاگون کے عہدیداروں کی آمد و رفت میں جو اضافہ ہوا ہے اس سے قومی حلقوں میں شکوک و شبہات بڑھ رہے ہیں اور اس آمد و رفت کو پاکستان کے اندرونی معاملات میں مداخلت کاآئینہ دار قراردیا جارہا ہے ان فوجی اور غیر فوجی عہدیداروں بالخصوص رچرڈ ہالبروک کی آمد کے بعد مائنس ون کے فارمولے کی بازگشت سنائی دی ہے جبکہ اسلام آباد میں امریکی سفارت خانے کی عمارت میں توسیع کے نام پر ایک فوجی چھاﺅنی کی تعمیر کا انکشاف ہواہے۔

امریکا کی طرف سے وزیرستان میں فوجی آپریشن کیلئے دباﺅ بڑھنے کیساتھ ڈرون حملوں میں بھی تیزی آگئی ۔ حالانکہ سوات اور دیگر علاقوں میں فوجی آپریشن کی کامیابی کے بعد یہ سلسلہ بند ہو جانا چاہئے تھا۔

پاکستان میں امریکی دخل اندازی روز بروز بڑھ رہی ہے۔ اسلام آباد میں سفارت خانے کی آڑ ھ میں امریکا اپنی چھاﺅنی قائم کررہاہے۔اسلام آباد میں امریکیوں نے200گھرکرائے پرلے رکھے ہیں اور یہ کون لوگ ہیں؟ ملک کے قانون نافذ کرنے والے ادارے ان سے یہ پوچھنے کی ہمت بھی نہیں رکھتے۔

امریکی جب چاہتے ہیں کسی سے پوچھے بغیر رکاوٹیں کھڑی کرکے اسلام آباد کے راستے بندکردیتے ہیں اور اطلاعات کے مطابق کوئی اعتراض کرتاہے تو دھمکی دیتے ہیں کہ پاکستان کی امداد بندکردیں گے۔ محض امداد کی خاطر حکمرانوں نے پاکستان کو امریکا کے حوالے کردیاہے۔

بدنام دہشت گرد تنظیم ”بلیک واٹر“ اسلام آباد ،لاہور اور کراچی سمیت کئی شہروں میں سرگرم ہے جس کے سربراہ پر عراق میں قتل اور عصمت دری کے کئی مقدمات چل رہے ہیں۔ اب یہ تجربہ پاکستان میں دوہرایاجارہاہے۔

خطرناک ترین پہلو یہ ہے کہ دہشت گرد تنظیم ”بلیک واٹر“ کے ہرکارے چارٹرڈطیاروں میں آتے ہیں اور ویزا کا تکلف بھی نہیں کرتے چنانچہ ان کی آمدورفت کا کوئی ریکارڈ بھی نہیں۔

پاکستان میں بلیک واٹر کا نام اسلام آباد میں میریٹ دھماکے کے وقت سامنے آیا اور بعض اخبارات و جرائد نے یہ دعوی کیا کہ اس دھماکے میں”بلیک واٹر“ کے اہلکار مارے گئے تاہم اب جبکہ اسلام آباد میں امریکی سفارت خانے کو بلاجواز توسیع دی جا رہی ہے اور ایک ہزار میرینز کے تقرر کی اطلاعات گشت کر رہی ہیں جسکے بعد سے پاکستان کے سیاسی، سماجی، مذہبی اور صحافتی حلقوں میںشدید تشویش کا اظہار کیا جا رہا ہے۔ا

وبامہ حکومت کی طرف سے افغانستان میں20 ہزار سے زائد نئے فوجیوں کی پاک افغان سرحد پر تعیناتی اور آپریشن میں توسیع کے بعد پاکستان میں طالبان جنگجوﺅں کے منتقل ہونے کا خدشہ بڑھ گیا ہے جس سے پاکستان کی قومی سلامتی متاثر ہو رہی ہے اس سے پہلے حکومت پاکستان نے ان جنگجوﺅں کی آمد و رفت روکنے کیلئے سرحد پر جن حفاظتی انتظامات کا تقاضہ کیا انہیں افغان حکومت نے مسترد کردیا۔

پاکستان کے تحفظات اور اندیشوں کو اہمیت دینے کے بجائے امریکا نے ڈرون حملے تیز کردیئے جس کی وجہ سے پاکستان کی خودمختاری سوالیہ نشان بن کر رہ گئی ڈرون حملوں کی وجہ سے قبائلی علاقوں میں بغاوت کی کیفیت پیدا ہوئی مگر حکومت پاکستان کے بار بار توجہ دلانے اور مودبانہ انداز میں مطالبہ کرنے کے باوجود امریکا نے ڈرون حملے تو خیرکیا بند کرنے تھے اب مسلسل دباﺅ ڈالا جا رہا ہے کہ پاکستان سوات کی طرح کا آپریشن وزیرستان میں بھی کرے تاکہ آئندہ کئی برسوں تک پاکستان افغانستان کی طرح غیر مستحکم اور بدامنی کا شکار رہے۔

سابقہ اور موجودہ حکومتوں کی امریکا نواز پالیسیوں کے نتائج اب آہستہ آہستہ منظر عام پر آرہے ہیں اور امریکا جس کی نظریں ایک طرف پاکستان کے ایٹمی ہتھیاروں پر مرکوز ہیں تو دوسری طرف اپنے مفادات حاصل کرنے کیلئے قبائلی علاقوں سے بلوچستان تک خوفناک کھیل کھیلنا چاہتا ہے۔ یہی وجہ ہے کہ امریکا اب دو قدم آگے بڑھ کر اور بہت تیزی کے ساتھ اپنے مفادات حاصل کرنے کی تگ و دو میں اس کھیل کا آغاز کرنے جارہا ہے جو خونی کھیل اس نے کابل اور بغداد میں کھیلا ہے۔

امریکا خطے میں ایسے حالات پیدا کر رہا ہے کہ پاکستان کے خلاف گھیرا تنگ کیا جائے۔ افغانستان میں پاکستان مخالف لابیوں کو حکومت سونپنا اور افغانستان کی سرزمین پر بھارت کو قونصل خانوں کی آڑ میں پاکستان مخالف سرگرمیوں کی کھلی چھٹی دینا امریکا کا دوہرا معیار ہے۔

امریکا نے ایک طرف بھارت کو پاکستان کے خلاف سازشوں کا کھلا ماحول فراہم کرکے پاکستان کیلئے مشکلات پیدا کی ہیں تو دوسری طرف امریکا خود جو کھیل کھیل رہا ہے وہ سب کے سامنے ہے۔ قبائلی علاقوں سے بلوچستان تک آگ و خون کا بازار گرم ہے۔ جاسوس طیاروں کے حملوں سے بے گناہوں کا خون بہایا جارہا ہے مگر دوسری طرف ہمارے حکمرانوں کی حالت یہ ہے کہ زبانی کلامی احتجاجی بیانات کے سوا امریکی جارحیت اور سازشوں کو روکنے کیلئے کوئی مثبت اقدام نہیں کیا گیا۔

سیاستدان چاہے اپوزیشن میں ہو ں یا حکومت میں انہوں نے امریکا ہی کو اقتدار کی سیڑھی تصور کرتے ہوئے وہ حالات پیدا کیے کہ امریکا کی مرضی کے بغیر کوئی حکومت نہیں چل سکتی۔ سیاستدان پہلے تو امریکا کی پرزور الفاظ میں مخالفت کرتے ہیں اور جب انہیں یہ یقین ہو جاتا ہے کہ اب عوام بیوقوف بن چکے ہیں تو وہ اقتدار حاصل کرنے کیلئے امریکا کی گود میں جاکر بیٹھ جاتے ہیں۔

یہ بھی اطلاعات ہیں کہ جن امریکیوں کو ناپسندیدہ قراردے کر ملک سے نکالاگیاتھا ان کو دوبارہ ویزا دے دیا گیا۔ ایسے ہی ایک شخص نکولس شمیڈل کو جو بظاہرصحافی تھا مگر اس کی سرگرمیاں مشکوک تھیں پاکستان سے نکالاگیا تو اگلے ہی ہفتہ پاکستانی سفیر حسین حقانی نے اس کو ویزا دے کر پھرواپس پاکستان بھجوادیا

۔سوال یہ پیدا ہوتا ہے کہ اگروہ شخص مشکوک سرگرمیوں میں ملوث نہیں تھا تو اسے نکالاکیوں گیا اور اگر وہ جاسوسی میں ملوث تھا تو حسین حقانی نے اس پر خصوصی نظرکرم کیوں فرمائی؟ کیا اس نے بھی پاکستان کی امداد رکوانے کی دھمکی دی تھی یاحسین حقانی بھی خصوصی امریکی دائرے کا ایک حصہ ہیں۔

پاکستانی وزیر خارجہ شاہ محمود قریشی کا کہنا ہے کہ اسلام آباد میں امریکی سفارت خانے کی توسیع پر مجھے کوئی پریشانی نہیں۔شاہ صاحب کی خدمت میں عرض ہے کہ سیاستدانوں اور حکمرانوں کا تو امریکا سے مفاد وابستہ ہوسکتا ہے اس لئے انہیں کوئی پریشانی نہیں ۔ لیکن حقیقت یہ ہے کہ پاکستان کی17کروڑ عوام کو امریکی سرگرمیوں اور مستقبل کے حوالے سے خوفناک سازشوں پر شدید پریشانی لاحق ہے امریکا جن مقاصد کو لے کر آگے بڑھ رہا ہے اور اس خطے میں اپنے قدم جمانے کی جو کوششیں کر رہا ہے بھارت کو خطے کا تھانیدار بناکر پاکستان اور چین کیلئے جو مشکلات پیدا کرنا چاہتا ہے اس سے اب عوام واقف ہوچکے ہیں۔

امریکا ایک طرف پاکستان کے خلاف سازشوں میں مصروف ہے،بھارت کو پاکستان کے خلاف سازشوں کیلئے کھلی چھٹی دے رکھی ہے ،ڈرو ن حملے کیے جارہے ہیں تو دوسری طرف تعلقات کو مستحکم بنانے کی باتیں کی جاتی ہیں۔امریکا کے خطے میں واضح خطرناک عزائم اور سازشوں کے طشت ازبام ہونے کے بعد ہمارے سیاستدانوں اور حکمرانوں کی بے حسی دیکھ کر قوم سراپا احتجاج ہے ان کی سوالیہ نظریں پوچھتی ہیں کہ کب تک ہمارے حکمران اور سیاستدان امریکہ کے آگے جی حضوری کا سلسلہ جاری رکھتے ہوئے ملک و قوم کے مستقبل کو تاریک کرتے رہیں گے۔

حکومت کا فرض ہے کہ وہ پاکستانی عوام، سیاسی و مذہبی حلقوں اور پاک فوج کی قیادت کے تحفظات کی روشنی میں امریکا سے کھل کر بات کرے۔ ”بلیک واٹر“ کے کارندوں کو ملک سے باہر نکالا جائے کہ یہ ہمارے ایٹمی اثاثوں اور قومی سلامتی کیلئے خطرہ ہیں۔

اسلام آباد میں امریکی سفارت خانے کی توسیع کے نام پر فوجی اڈے میں تبدیلی کرنے کے فیصلے کی مزاحمت کی جائے اور امریکا کے کہنے پر کوئی نیا فوجی آپریشن ہر گز نہ کیا جائے۔ اب تمام سیاستدانوں،حکمرانوں اور مذہبی جماعتوں کو مل کر امریکا کے جارحانہ عزائم کو روکنا ہوگا۔

قوم گزشتہ62 سالوں سے جاری امریکا کی پاکستان کے سیاسی،داخلی ،عسکری ،معاشی اور سماجی شعبوں میں مداخلت کا خاتمہ چاہتی ہے۔ کبوتر کی طرح آنکھیں بند کرنے سے ہم بچ نہیں سکیں گے اب ہمیں حقائق کا ادراک کرتے ہوئے وہ انقلابی فیصلے کرنا ہوں گے جس سے ملک و قوم کا مستقبل محفوظ ہو۔

انشاءاللہ