سری لنکن فوج کے ہاتھوں تامل ٹائیگرز کی شکست میں پاکستان کے کولمبو سے دفاعی تعاون اور بڑے پیمانے پر جدید دفاعی آلات کی فراہمی نے اہم کردار ادا کیا، پاکستانی اسٹیبلشمنٹ کے اعلیٰ عہدیداروں کے مطابق حالیہ سالوں میں پاکستان اور سری لنکا کے مابین دفاعی تعاون میں بے حد اضافہ ہوا ہے۔ ذرائع کا کہنا ہے کہ ایک سال قبل مئی 2008ء کے پہلے ہفتے میں سری لنکن فوج کے سربراہ جنرل پونسیکا اپنے پاکستانی ہم منصب جنرل اشفاق پرویز کیانی سے جدید ہتھیاروں کی خریداری کے معاہدے کو حتمی شکل دینے کے لئے مذاکرات کی غرض سے پاکستان آئے اس وقت سری لنکن فوج تامل ٹائیگرز کے ساتھ شدید لڑائی میں مصروف تھی۔ دورے کے دوران جنرل پونسیکا نے پاکستان سے 22 الخالد ٹینکوں کی خریداری کے 100 ملین ڈالر کے معاہدے کو حتمی شکل دی اس کے علاوہ انہوں نے دفاعی حکام کو 65 ملین ڈالر کے ہتھیاروں کی خریداری کا آرڈر بھی دیا انہوں نے اڑھائی لاکھ راؤنڈز، 25 ملین ڈالر کا مارٹر اسلحہ اور ڈیڑھ لاکھ ہینڈ گرنیڈز فوری طور پر ایک ماہ کے اندر لنکن فوج کو فراہم کرنے کا معاہدہ بھی کیا، پاکستان نے سری لنکن آرمی چیف کی اس درخواست کو بھی قبول کر لیا جس میں انہوں نے کہا کہ تامل ٹائیگرز کے ہیڈ کوارٹر پر قبضے کی لنکن فوج کی کوششوں کو تقویت دینے کے لئے پاکستان ہر دس دن بعد اسلحے کی کھیپ لنکا بھیجے۔ 19 جنوری کو راولپنڈی میں پاکستانی سیکرٹری دفاع اور سری لنکن ہم منصب کے درمیان مذاکرات میں فوجی تعاون مزید بڑھانے، فوجی مشقوں اور انٹیلی جنس شیئرنگ کے حوالے سے معاہدہ طے پایا یہ معاہدہ ایسے وقت میں ہوا جب لنکن میڈیا میں رپورٹس زیرگردش تھیں کہ اگست 2008ء میں تامل ٹائیگرز کے متعدد فوجی اڈوں پر ہونے والے کامیاب فضائی حملوں میں پاکستان ایئرفورس کے پائلٹس نے بھی حصہ لیا تھا۔

__________________