2010 : اکتوبر-26
اسلام آباد (مانیٹرنگ ڈیسک) ٹرانسپیرنسی انٹرنیشنل نے کرپٹ ترین ممالک کی رپورٹ جاری کردی ہے جس کے مطابق پاکستان میں کرپشن میں بے انتہا ءاضافہ ہوا ہے اورگزشتہ سال پاکستان کرپٹ ترین ممالک کی فہرست میں 42ویں نمبر پر تھا لیکن اب پاکستان کا 34ویں نمبر پر آگیا ہے۔ٹرانسپیرنسی انٹرنیشنل نے کرپشن پریسیپشن انڈیکس2010 ءجاری کردیا ہے۔ یہ انڈیکس مختلف ممالک میں کرپشن کو جانچنے کیلئے دنیا کا سب سے قابل اعتبار پیمانہ سمجھا جاتا ہے۔ کرپشن پرسیپشن انڈیکس کے تحت ممالک کو صفر سے دس تک پوائنٹس دیئے جاتے ہیںاورجس ملک کو جتنے زیادہ پوائنٹس ملتے ہیں وہاں کرپشن اتنی ہی کم ہوتی ہے اور جن ممالک کے پوائنٹس کم ہوتے جاتے ہیں وہاں بدعنوانی کی سطح اتنی ہی زیادہ ہوتی جاتی ہے۔کرپشن پریسیپشن انڈیکس کے ذریعے دنیا کے178 ممالک کی درجہ بندی کی گئی ۔ ان میں سے تین چوتھائی ممالک نے صفر سے پانچ تک پوائنٹس حاصل کئے ہیںجس سے ظاہر ہوتا ہے کہ کرپشن بدستور ترقی کی راہ میں بڑی رکاوٹ ہے۔رپورٹ کے مطابق پاکستان 2.3 پوائنٹس کے ساتھ34 ویں نمبر ہے جبکہ گزشتہ سال پاکستان کا نمبر42 واں تھا۔ فہرست میں پاکستان کے آٹھ درجے نیچے آنے کا مطلب ہے کہ یہاں بدعنوانی میں اضافہ ہوا ہے۔ پاکستان کی نسبت بھارت بدعنوان ممالک کی فہرست میں90 نمبر پر ہے۔ صومالیہ دنیا کا بدعنوان ترین ملک ہے جبکہ افغانستان اور میانمارمشترکہ طور پر دوسرے نمبر پر ہیں ۔رپورٹ کے مطابق عراق کرپٹ ترین ممالک کی فہرست میں تیسرے نمبر پر ہے۔اگر دنیا کے سب سے کم بدعنوان ممالک کی بات کی جائے تو ڈنمارک ، نیوزی لینڈ اور سنگاپور9.3 پوائنٹس کے ساتھ مشترکہ طو رپر دنیا کے سب سے کم بدعنوان ملک ہیں جبکہ فن لینڈ اور سوئیڈن مشترکہ طورپر دوسرے اور کینیڈا تیسرے نمبر پر ہے۔14اکتوبر2010ءکو جاری کردہ ایک امریکی سروے میں پاکستان کو کرپشن اور انصاف تک رسائی میں بدترین ملک شمار کیا گیا تھا۔ملک میں قانون کی حکمرانی کی عدم موجودگی کے واضح ثبوت پچھلے ایک سال کے دوران نیشنل انشورنس کارپوریشن،پاکستان سٹیل اور رینٹل پاور پلانٹ جیسے بڑے کرپشن کیسز سے آشکار ہوئے ہیں۔

__________________
جاویداسد