پاکستان کو دنیا بھر سے ملانے والی فائبر آپٹک کیبل ایس ایم ڈبلیو4 کراچی کے قریب سمندر میں کٹ گئی جس سے ملک بھر میں انٹرنیٹ سروسز اور ٹیلے فون نظام میں خرابی پیدا ہوگئی ہے۔

پی ٹی سی ایل نے فائبر آپٹک کیبل ایس ایم ڈبلیو4کے کٹنے کے بعد ٹریفک متبادل نظام ایس ایم ڈبلیو3 پر منتقل کر دی جس سے ٹیلی کام اور آئی ٹی سروسز کے بحران پر کافی حد تک قابو پالیا گیاہے۔

انٹرنیٹ سروس فراہم کرنے والی کمپنی کے نمائندوں نے تصدیق کرتے ہوئے بتایا کہ فائبر آپٹک کیبل کٹنے سے صارفین کو انٹرنیٹ اور وائس کالز کی فراہمی میں عارضی طور پر دشواری کا سامنا کرنا پڑرہا ہے۔

تاہم سروسز بالکل معطل نہیں ہوئیں اور سست رفتاری سے جاری ہیں۔ پی ٹی سی ایل کے ذرائع نے بتایا کہ متاثرہ فائبر آپٹک کیبل دس دن کے اندر ٹھیک کرلی جائے گی۔