واشنگٹن ۔۔۔۔۔۔۔۔۔ امریکہ نے یقین ظاہر کیا ہے کہ سیکورٹی امور میں معاونت سے متعلق پچاس ملین ڈالر کی امریکی امداد پر کانگریس کی بعض پابندیوں کے باوجود پاکستان کو ایف سولہ طیاروں کی فراہمی پر اثر نہیں پڑے گا۔ جنوبی ایشیا کیلئے امریکہ کے نائب وزیرخارجہ رچرڈ باؤچر نے یہ بات واشنگٹن میں صحافیوں کے ساتھ گفتگو کرتے ہوئے کہی۔ انہوں نے واضح کیا کہ کانگریس کے اقدامات سے پاکستان کو ایف سولہ کی فروخت کا عمل متاثر نہیں ہوگا۔ پاکستان نے ایف سولہ خریدے ہیں، امریکہ کی دفاعی امور میں معاونت مختلف مقاصد کیلئے ہوتی ہے۔ انہوں نے ایمرجنسی کے خاتمے اور دہشت گردی کے خلاف پاکستانی حکومت کے اقدامات کی تعریف کی اور کہا کہ امریکہ ملک میں شفاف انتخابات کا انعقاد چاہتا ہے۔ انتخابات کا جائزہ لینے کیلئے مبصرین پاکستان جارہے ہیں۔ صدر پرویز نے منصفانہ انتخابات کرانے کا وعدہ کیا ہے۔ فوجی عہدہ چھوڑنے اور آئین بحال کرنے سمیت انہوں نے جمہوریت کے لئے اہم اقدامات کئے ہیں۔