امریکہ نے کہا ہے کہ پاکستان نے کچھ ایسے اقدامات کیے ہیں جنہوں نے اسے اس کی کچھ امداد روکنے کا جواز فراہم کیا ہے، جس کے بعد وہ اس کی آٹھ سو ملین ڈالر کی فوجی امداد روک رہا ہے۔
پاکستانی فوج کے ترجمان میجر جنرل اطہر عباس نے اس خبر پر تبصرہ کرتے ہوئے کہا کہ انہیں سرکاری طور پر اس بارے میں مطلع نہیں کیا گیا کہ امداد روکی جا رہی ہے اس لیے وہ اس پر تبصرہ نہیں کر سکتے۔

تاہم انہوں نے بی بی سی سے بات کرتے ہوئے کہا کہ حال ہی میں فوج کے سربراہ نے خود کہا تھا کہ ہماری فوجی امداد کو سویلین امداد کی طرف موڑ دیا جائے۔ انہوں نے کہا کہ ’ہم نے جو بھی کارروائیاں کی ہیں چاہے وہ سوات میں ہو یا جنوبی وزیرستان میں امداد کے بغیر کی ہیں۔ ہمارے پاس یہ صلاحیت موجود ہے کہ بغیر کسی بیرونی امداد کے اس پر قابو پایا جا سکے۔‘

وائٹ ہاؤس کے چیف آف سٹاف بِل ڈیلی نے ٹیلیویژن چینل اے بی سی کے ایک ہفتہ وار پروگرام میں بتایا کہ اسامہ بن لادن کی ہلاکت کے واقعے پر پاکستان میں بہت تکلیف محسوس کی گئی ہے۔ انہوں نے کہا کہ پاکستان اور امریکہ کے تعلقات کو دیرپا بنانا ہوگا۔

انہوں نے اس بات کو تسلیم کیا کہ پاکستان امریکہ کی دہشت گردی کے خلاف جنگ میں اہم حلیف رہا ہے اور وہ خود بھی بڑے پیمانے پر دہشت گردی کا شکار بنانا ہے۔‘

ہم نے جو بھی کارروائیاں کی ہیں چاہے وہ سوات میں ہو یا جنوبی وزیرستان میں امداد کے بغیر کی ہیں۔ ہمارے پاس یہ صلاحیت موجود ہے کہ بغیر کسی بیرونی امداد کے اس پر قابو پایا جا سکے

فوج کے ترجمان میجر جنرل اطہر عباس

انہوں نے کہا کہ امریکہ اور پاکستان کا رشتہ ’دنیا کے الجھے ہوئے خطے میں الجھا ہوا اور مشکل رشتہ ہے۔‘ انہوں نے کہا کہ جب تک ’ہم ان مشکلات پر قابو نہیں لیتے ہم امریکی عوام کے ٹیکس کا کچھ وہ پیسہ روکیں گے جس کی انہوں نے پاکستان کو دینے کی منظوری دی تھی۔‘

اس سے قبل امریکی اخبار ’نیو یارک ٹائمز‘ نے اعلیٰ امریکی حکام کے حوالے سے بتایا تھا کہ فوجی امداد کی معطلی ہر سال پاکستان کو سکیورٹی کی مد میں دی جانے والی امداد کا ایک تہائی ہے۔

نیو یارک ٹائمز کے مطابق جو امداد متاثر ہوگی اس میں پاک افغان سرحد پر لگائی جانے والی پاکستانی فوج کے اخراجات کی مد میں 300 ملین ڈالر ہیں اور اس کے علاوہ تربیتی اور آلات کی مد میں بھی امداد شامل ہے۔

نیو یارک ٹائمز کے مطابق پاکستانی فوج کی افغان سرحد پر تعیناتی کے حوالے سے اخراجات کی مد میں دی جانے والی رقم پر نظرثانی کی جا رہی ہے کیونکہ دہشتگردی کے خلاف جنگ میں پاکستان کے کردار پر سوال اٹھائے جا رہے ہیں۔

معطل اور منسوخ کی گئی امداد میں کچھ فوجی سامان ایسا بھی ہے جو امریکہ نے پاکستان کو دینا تھا لیکن اب پاکستانی فوج اس کو قبول کرنے کے لیے تیار نہیں ہے۔
معطل اور منسوخ کی گئی امداد میں کچھ فوجی سامان ایسا بھی ہے جو امریکہ نے پاکستان کو دینا تھا لیکن اب پاکستانی فوج اس کو قبول کرنے کے لیے تیار نہیں ہے۔

اس فوجی سامان میں رائفلیں، گولہ بارود اور دیگر فوجی سامان شامل ہے۔ اس سے قبل اس سازو سامان کو اس وقت روک لیا گیا تھا جب پاکستان نے ایک سو سے زیادہ امریکی خصوصی دستوں کے تربیت کاروں کو ملک سے نکل جانے کا کہا تھا۔

نیو یارک ٹائمز کے مطابق امریکی وزارت دفاع پینٹاگون کے دو اعلیٰ اہلکاروں نے بتایا کہ کچھ فوجی سامان جس میں ریڈیو اور رات کو دیکھنے کے لیے دور بینیں اور ہیلی کاپٹر کا سامان ہے پاکستان کو نہیں دیا جا سکا کیونکہ پاکستان نے فوجی اہلکاروں کو ویزے جاری نہیں کیے۔

اس سے قبل پچھلے ماہ امریکی ایوانِ نمائندگان نے دفاعی اخراجات کے بل کی منظوری دی تھی جس کے تحت اس مد میں پاکستان کو دی جانے والی امداد پر پابندیاں عائد کی گئی تھیں۔

اِس بِل کے تحت، پاکستان کے لیے منظور کی گئی ایک اعشاریہ ایک ارب ڈالر کی امداد کا پچھتر فیصد حصہ اس وقت تک جاری نہیں کیا جائے گا جب تک صدر اوباما کی انتظامیہ کمیٹی کو یہ رپورٹ نہیں دے گی کہ پاکستان کو دی گئی امداد کہاں خرچ ہو گی۔

پچھلے ماہ امریکی وزیر خارجہ ہلری کلنٹن نے سینیٹ کمیٹی میں بیان میں کہا تھا ’ہم فوجی امداد پاکستان کو اس رفتار سے دینے کو تیار نہیں ہیں جب تک کہ ہمیں یقین نہ ہو کہ پاکستان نے دہشت گردی کے خلاف جنگ میں مؤثر اقدامات اٹھائے ہیں۔‘


خبر

__________________
بیاض کمبوہ پڑھنے کے لیے ایڈریس بار میں ٹائپ کریں،
biazekamboh.co.cc