پاکستان کی تقریبا آدھی بالغ آبادی ان پڑھ ہے،یونیسکو
اسلام آباد . . . اسلام آباد میں یونیسکو اور پل ڈاٹ کے زیر اہتمام کل جماعتی کانفرنس میں رپورٹ پیش کی گئی ہے کہ پاکستان کی تقریبا آدھی بالغ آبادی ان پڑھ ہے۔ تعلیم سب کے لیے ، کے عنوان سے جاری کانفرنس میں راجہ ظفر الحق ، مشاہد حسین سید ، شاہ محمود قریشی سمیت تمام سیاسی جماعتوں کے نمائندے شریک ہیں ۔ کانفرنس میں پیش کی گئی رپورٹ کے مطابق پاکستان میں 2015 تک ان پڑھ آبادی 52 ملین ہو جائے گی جو کئی ممالک کی کل آبادی سے زیادہ ہے ۔ رپورٹ میں کہا گیا ہے کہ پاکستان میں پرائمری جماعتوں میں داخلے کی شرح 53 فیصد ہے جو جنوبی ایشیا کے ممالک میں سب سے کم ہے ۔ رپورٹ کے مطابق انسانی ترقی کے اعشاریہ کے حوالے سے یو این ڈی پی نے پاکستان کو 136 ویں نمبر پر رکھا ہے ۔

__________________