پاکستان کے ایٹمی اثاثوں کا حفاظتی انتظام موثر ہے ،عالمی ادارے معترف ہیں،صدر پرویز



چشمہ / میانوالی(جنگ نیوز) صدر پرویز مشرف نے کہا ہے کہ پاکستان اپنے تمام جوہری پاور پلانٹس پر شاندار حفاظتی اور سیکورٹی معیارات کو برقرار رکھنے والا ذمہ دار اور باوقار جوہری ملک ہے، پاکستان کا جوہری حفاظتی انتظام موٴثر اور فعال ہے اور عالمی ادارے اس کا اعتراف کرتے ہیں، حکومت ملک کی تیزی سے ترقی کرتی ہوئی معیشت کی ضروریات کو پورا کرنے کیلئے بجلی کی پیداوار بڑھانے کے جامع منصوبہ پر عمل پیرا ہے۔ انہوں نے ان خیالات کا اظہار منگل کو چشمہ نیوکلیئر پلانٹ Ii میں ایک اجتماع سے خطاب کرتے ہوئے کیا۔ قبل اسکے انہوں نے ری ایکٹر کی” کنٹین منٹ ڈوم پلیس منٹ“ کی رسم انجام دی۔ صدر مملکت نے جو ملک کی نیشنل کمانڈ اتھارٹی کے چیئرمین بھی ہیں کہاکہ پاکستان ایٹمی توانائی کمیشن اور پاکستان نیوکلیئر ریگولیٹری اتھارٹی کو مطلوبہ مقصد کے حصول کیلئے مل کر کام کرنا چاہئے۔ انہوں نے جوہری پاور پلانٹس پر شاندار حفاظتی انتظامات اور تقاضوں کو پورا کرنے پر پی اے ای سی اور پی این آر اے کی کاوشوں کو سراہا۔ صدر نے کہاکہ یہ امر قابل اطمینان ہے کہ کینپ اور چشنپ I پر موجود جوہری پاور پلانٹس پر اعلیٰ حفاظتی اور سیکورٹی معیارات برقرار رکھے جا رہے ہیں۔ 325 میگاواٹ گنجائش کا حامل یہ پلانٹ چینی معاونت اور فنی تعاون سے مکمل کیا جا رہا ہے اور یہ 2010ء کے آخر تک مکمل ہونے کی توقع ہے۔ ڈوم پلیسمنٹ کی تقریب نیوکلیئر پاور پلانٹ کے تعمیراتی مراحل میں اہم ترین سنگ میل ہے۔ صدر نے کہاکہ حکومت نے ملک کی تیزی سے ترقی کرتی ہوئی معیشت کی ضروریات کو پورا کرنے کیلئے بجلی کی پیداوار بڑھانے کیلئے ایک جامع منصوبہ وضع کیا ہے، پاکستان ایٹمی توانائی کمیشن کو ملک کے توانائی سیکورٹی پلان کے مطابق جوہری توانائی میں اضافے کی ذمہ داری سونپی گئی ہے۔ روایتی اور قابل تجدید توانائی وسائل کے علاوہ جوہری ٹیکنالوجی بھی ملک میں بجلی کا ایک اہم ذریعہ ہے۔ صدر پرویز مشرف نے جوہری توانائی کی پیداوار سمیت مختلف ترقیاتی منصوبوں میں چین کے اشتراک کار اور فنی معاونت کو سراہتے ہوئے کہاکہ چین کے صدر ہوجنتاؤ کے ساتھ ان کے ذاتی تعلقات نے ان منصوبوں کو مزید تقویت دی ہے۔