بیروت ۔۔۔۔۔۔۔۔ پاکستان کی جانب سے دو ٹوک اعلانات کے باوجود غیر ملکی میڈیا میں ایٹمی ہتھیاروں سے متعلق پروپیگنڈے کا سلسلہ جاری ہے مزید یہ کہ ایٹمی توانائی کے بین الاقوامی ادارے آئی اے ای اے کے سربراہ محمد البرادی نے بھی الزام لگایا ہے کہ پاکستان کے ایٹمی ہتھیار انتہا پسندوں کے ہاتھ لگنے کا خدشہ ہے۔ یہ بات انہوں نے ایک خبر رساں ادارے سے گفتگو میں کہی۔ محمد البرادی نے کہا کہ پاکستان کے پاس تیس سے چالیس ایٹمی ہتھیار موجود ہیں ، خدشہ ہے کہ ابتر صورتحال یا انتہا پسندی ملک میں جڑیں مضبوط کرسکتی ہے۔ البرادی نے کہا کہ انہیں پریشانی سے ایٹمی ہتھیار پاکستان یا افغانستان کے انتہا پسندوں کے ہاتھ لگ سکتے ہیں۔ اگر مشرق وسطیٰ یا مسلم دنیا میں جنگ ہوئی تو اس کا ایران سے زیادہ برا اثر پاکستان میں ہوسکتا ہے۔ دریں اثناء ایٹمی پروگرام سے متعلق مغربی میڈیا کے الزامات مسترد کرتے ہوئے صدر پرویز مشرف کئی بار واضح کرچکے ہیں کہ پاکستان کے ایٹمی ہتھیار انتہائی محفوظ ہیں اور ان کی حفاظت کیلئے باقاعدہ نظام بھی موجود ہے۔ پاکستانی حکومت کئی بار واضح کرچکی ہے کہ ایٹمی ہتھیار انتہا پسندوں کے ہاتھ نہیں لگ سکتے اور مغربی میڈیا کی رپورٹس بے بنیاد ہیں۔ پاک فوج بھی بار بار وضاحت کرچکی ہے کہ پاکستان کے ایٹمی ہتھیاروں کی حفاظت کا انتہائی جدید ترین جامع اور موثر نظام موجود ہے جو دنیا کے کسی بھی ترقی یافتہ ملک کے نظام کا ہم پلہ ہے۔ ملک کے بیشتر علاقوں میں بارش،پہاڑوں پر بر فباری جاری،چترال میں تودہ گر نے سے 7 افراد ہلاک چترال، مظفرآباد (نمائندگان جنگ)آزاد کشمیر،صوبہ سرحدسمیت ملک کے بیشتر علاقوں میں بارش اورپہاڑوں پر برفباری کا سلسلہ جاری ہے اور کئی مقامات پر کچے مکانات منہدم ہونے کی اطلاعات ہیں اور متعدد رابطہ سڑکیں بند ہیں جبکہ چترال میں برف کا تودہ گرنے سے 7افرادہلاک ہوگئے ہیں۔تفصیلات کے مطابق چترال میں برفانی تودے گرنے سے7 اسکاؤٹس اورساہیوال میں شدیدسردی سے3 افراد ہلاک ہوگئے۔ پشاورکے شمال مشرق میں واقع پہاڑی سلسلے دروش میں ایک برفانی تودے کے چترال اسکاؤٹس کی ایک چوکی پرگرنے کے باعث7 اسکاؤٹس جاں بحق اور6 زخمی ہو گئے۔مقامی پولیس افسربہادرخان نے بتایاکہ واقعہ علاقے میں گذشتہ کئی روز سے جاری شدید برفباری کے باعث پیر کی رات پیش آیا۔ انہوں نے مزیدکہاکہ تودہ اس تیزی سے گرا کہ اسکاؤٹس کوچوکی سے بھاگنے کا موقع نہ مل سکا تاہم14 اسکاؤٹس میں سے6کوزندہ بچالیاگیاہے۔تودہ گرنے سے چوکی مکمل طور پر تباہ ہوگئی۔برفباری سے چترال میں ٹیلیفون اور بجلی کا نظام درہم برہم ہے اورچترال شہر سے تحصیل مستوج، تحصیل موڑ کہو، تحصیل لور کہو اور تحصیل گرم چشمہ اور دودش کا رابطہ منقطع ہو گیا ہے جبکہ 36 وادیوں تک رسائی ناممکن ہو گئی ہے۔دوسری جانب لواری ٹاپ تاحال ٹریفک کیلئے بند ہے، ضلع مانسہرہ میں برف باری جاری ہے جبکہ وادی کاغان میں قریباً چار فٹ برف پڑنے سے کاغان سے ناران جانے والی شاہراہ اور دیگر رابطہ سڑکیں بند ہو گئی ہیں۔ وادی کوئٹہ اور دیگر علاقوں میں بارش اور برفباری سے سردی کی شدت میں اضافہ ہو گیا ہے،کوئٹہ میں مجموعی طور پر 35 ملی میٹر سے زائد بارش ریکارڈ کی گئی ہے جبکہ گڈانی، ساکران، ضلع لسبیلہ کے مختلف علاقوں میں تیز ہواؤں کے ساتھ طوفانی بارش ہوئی۔ برف باری کا سلسلہ پاک افغان سرحدی علاقوں کے علاوہ ٹوبہ اچکزئی، ٹوبہ کاکڑی، ضلع پشین، زیارت، کان مہترزئی، قلعہ عبداللہ اور دیگر علاقوں میں بھی جاری ہے ۔ آزاد کشمیر میں زلزلے سے متاثرہ وادی نیلم، مظفرآباد، باغ اور راولاکوٹ میں زندگی مفلوج ہو گئی ہے، برفباری کی وجہ سے وادی نیلم، وادی لیپا اور کرنہ کا رابطہ مظفرآباد سے منقطع ہو گیا ہے جبکہ ضلع باغ، سدھن گلی روڈ، فارورڈ کہوٹہ روڈ بھی ہر قسم کے ٹریفک کیلئے بند ہے۔ برفباری کے باعث ایندھن کی ضروریات بڑھنے سے لکڑی، کوئلہ اور گیس کی قلت ہو گئی ہے، کیمپوں اور شیلٹرز میں مقیم متاثرین زلزلہ شدید موسم کے باعث مشکلات کا شکار ہیں تاہم مینجمنٹ آرگنائزیشن متاثرین زلزلہ میں اضافی کمبل اور کھانے پینے کی اشیاء فراہم کر رہی ہے۔