فیڈرل پبلک سروس کمیشن (ایف پی ایس سی )کے چیئرمین لیفٹیننٹ جنرل (ر)شاہد حامد اور سیکریٹری ایف پی ایس سی نے ذاتی رنجشوں کا بدلہ لیتے ہوئے پورے پاکستان میں سی ایس ایس امتحان میں 12ویں پوزیشن حاصل کرنے والے ایم ایس سی (نفسیات) پاس 19 گریڈ‌ کے افسر فخر عالم کو انکی 30سالہ ایمانداری وفرض شناسی کے جرم میں نوکری سے جبراً فارغ کردیا۔ اتوار کو ایف پی ایس سی سے انتہائی قابل اعتماد ذرائع نے بتایا کہ فخر عالم نمازی، پرہیزگار اور اپنے کام میں ماہر شخص ہیں انہیں 2006 میں چیئرمین ایف پی ایس سی لیفٹیننٹ جنرل (ر)شاہد حامد نے ایک خاتون کو ماورائے قانون ڈسٹرکٹ مینجمنٹ گروپ میں کھپانے کی سفارش کی لیکن فخر عالم (ڈائریکٹر سیکریسی) نے انکار کر دیا جس پر اُنکے خلاف رولز کی خلاف ورزی کا چارج لگا یا گیا اور اِس طرح 2007ء میں چیئرمین ایف پی ایس سی اور فخر عالم کے مابین سرد جنگ کا آغاز ہوا۔ اُس وقت محض انٹر پاس ڈپٹی ڈائر یکٹر ریکروٹمنٹ چوہدری حمید نے غیر قانونی احکامات پر عملدرآمد کیا اور مذکورہ خاتون کو بھرتی کروا دیا جس پر بڑوں سے اچھے تعلقات رنگ لائے اور انہیں قانون اور میرٹ کو بالائے طاق رکھ کر ایک ہی سال کے اندر 2 ترقیاں دے کر پہلے ڈائریکٹر اور اس کے بعد ڈائریکٹر جنرل مقرر کردیا گیا جبکہ ملک بھر میں‌ سی ایس ایس کے امتحان میں 12ویں پوزیشن حاصل کرنے والے فخر عالم کو 27 مارچ 2009ء کو نوکری سے برطرف کردیا گیا۔ انٹر پاس ڈائریکٹر جنر ل چوہدری حمید 1980ء میں انٹیلی جنس بیورو سے وابستہ تھے جس کے بعد فیڈرل پبلک سروس کمیشن میں اسٹینو گرافر کی حیثیت سے ذمہ داریاں سنبھالیں وہ 6 سال تک فخر عالم کے اسٹینو گرافر رہے، اس کے بعد ان کے پرسنل سیکریٹری بنے۔ تین سال تک خدمات انجام دینے کے بعد چوہدری صاحب دیکھتے ہی دیکھتے ڈائریکٹر جنرل ریکروٹمنٹ‌ لگ گئے۔ یہی نہیں‌، حال ہی میں ریسرچ آفیسر رمیض احمد کو بھی ماورائے قانون ترقی دیکر ڈائریکٹر ایف پی او تعینات کیا گیا ہے۔ اس سلسلے میں چیئرمین ایف پی ایس سی لیفٹیننٹ جنرل (ر)شاہد حامد اور سیکریٹری بشیر احمد چوہان سے رابطہ کیاگیا تو انہوں نے بات کرنے سے صاف انکار کر دیا۔ قبل ازیں 27 مارچ کو فیڈرل پبلک سروس کمیشن کے ہیومن ریسورس (ایچ آر) ڈیپارٹمنٹ کے ڈائریکٹر عبدالمتین آفریدی کے جاری کردہ نوٹیفکیشن نمبر F.13/6/2008-HR کے مطابق فخر عالم پر بے ایمانی اور کام سے عدم واقفیت، سینئر افسران کے ساتھ جارحانہ ومنفی رویے کے الزام عائدکیے گئے ہیں اور کہا گیا کہ انہوں نے اعلیٰ افسران کو خط لکھا کہ شیطانیت اور غلط کاموں میں ملوث لوگوں کے خلاف اُٹھ کھڑے ہوں جس پر ایف پی ایس سی میں26فروری تا 3مارچ ہڑتال رہی اور سی ایس ایس کے امتحانات 2009منسوخ ہوگئے۔ ان کے خلاف ایف پی ایس سی آرڈیننس کے سیکشن 5 شق 4 کے تحت تمام شواہد کے ساتھ تحقیقات کی گئیں جس میں وہ مجرمانہ غفلت ، غیر قانونی ہتھکنڈوں، کام سے عدم واقفیت اور سینئر افسران کے احکامات تسلیم نہ کرنے میں ملوث پائے گئے، اس لئے انہیں نوکری سے فراغت کے آرڈیننس کی سیکشن 3کے خصوصی اختیارات کو استعمال کرتے ہوئے جبری ریٹائر کیا جا تا ہے۔