دبئی کے حکا م نے جیو ٹیلیویژن نیٹ ورک کے جیو نیوز چینل کو 48گھنٹے میں اپنے بعض پروگرام بند کرنے یا دبئی سے نشریات ختم کرنے کا حکم دیا ہے۔جیو ٹیلیویژن نیٹ ورک کے صدر عمران اسلم نے تصدیق کی ہے کہ میڈیا سٹی دبئی کے حکام نے یہ ہدایات جاری کی ہیں اور یہ کہ جیو کی نشریات دبئی سے منتقل کی جا رہی ہیں۔

عمران اسلم نے کہا ہے کہ یہ واضح نہیں ہے کہ ہم پر دباؤ صدر مشرف کی طرف سے ہے یا گیلانی انتظامیہ کی جانب سے، لیکن ہمیں براہِ راست دبئی کی حکومت نے یہ کہا ہے کہ گذشتہ ہفتوں میں پیش کیے جانے والے بعض پروگرام قابلِ قبول نہیں ہیں۔

گذشتہ نومبر میں بھی ایمرجنسی کے نفاذ کے وقت پاکستان کے تمام نیوز چینلوں کی نشریات بند کر دی گئی تھیں اور جیو کی نشریات دبئی سے بھی بند کر دی گئیں، جو کئی ماہ بعد بحال ہوئیں۔

ادارے کی انتظامیہ کے مطابق جیو نیوز کی نشریات جاری رکھنے کے لئے متبادل انتظامات کیے جا رہے ہیں۔