پرویز الٰہی سے سیکورٹی واپس نہیں لی، مزید بھی دینے کو تیار ہیں، شہباز شریف
لاہور (جنگ نیوز) پاکستان مسلم لیگ (ن) کے صدر میاں شہبازشریف نے کہا ہے کہ آج پاکستان میں انصاف بکتا ہے جب تک انصاف کی فراہمی عام آدمی تک ممکن نہ ہوئی پاکستان اقوام عالم میں اپنا مقام حاصل نہ کر سکے گا۔ وہ اتوار کی رات مقامی ہوٹل میں برطانوی رکن پارلیمنٹ چودھری محمد سرور کی طرف سے دیئے گئے عشایئے سے خطاب کر رہے تھے۔ میاں شہبازشریف نے کہا کہ اگر 2 نومبر 2007ء والی عدلیہ کو فوری طور پر اسی حالت میں بحال نہ کیا گیا تو اس وقت تک نہ تو کسی بچے کو تعلیم ملے گی اور نہ ہی کسی شخص کو انصاف میسر ہو گا۔ انہوں نے کہا کہ عدلیہ کی بحالی کا تعلق غریب آدمی سے ہے۔ آج پاکستان میں بااثر افراد کو انصاف مل جاتا ہے یا وہ انصاف کو خرید لیتا ہے مگر عام آدمی تک اس کی رسائی ممکن نہ رہی ہے اور یہی وجہ ہے کہ 2 نومبر والی عدلیہ کی بحالی کے بغیر ملک آگے نہیں بڑھ سکتا اور ترقی کی منازل طے نہیں کر سکتا۔ میاں شہبازشریف نے کہا کہ معاشی طور پر آزاد اور خود مختار اور اقوام عالم میں اپنا مقام بنانے کے بعد ہی ہم کشمیر کے حل کی بات کر سکتے ہیں۔ میاں شہبازشریف نے اس عزم کا اظہار کیا کہ مسلم لیگ (ن) عدلیہ کی بحالی کے موقع پر پی سی او کے تحت حلف نہ اٹھانے والے ججز کو پارلیمنٹ کے ذریعے ان کے منصب پر ضرور بحال کرائے گی اور حکومت میں موجود اتحادی جماعتیں اعلان مری پر ہر صورت عملدرآمد کریں گی۔

__________________