اسلام آباد(مظہر طفیل) سابق صدر جنرل (ر) پرویز مشرف جوگزشتہ ماہ لندن میں رسمی طورپر اپنی سیاسی جماعت آل پاکستان مسلم لیگ کااعلان کرچکے ہیں، اگلے ماہ لندن سے مستقل بنیادوںپر دبئی منتقل ہو جائیں گے۔ چودھری فواد نے کہاکہ سابق صدر اگلے ماہ لندن سے دبئی منتقل ہورہے ہیں تاکہ موثر انداز میں اپنی پارٹی کو ترقی دے سکیں۔ اے پی ایم ایل کے سیکرٹری جنرل فواد نے جنگ سے گفتگو کرتے ہوئے کہا کہ مختلف سیاسی جماعتوں کے سربراہ سابق صدر سے مطالبہ کررہے تھے کہ وہ دبئی منتقل ہوجائیں تاکہ ان میں سے جو اے پی ایم ایل میں شامل ہونا چاہتے ہیں، وہ ان سے آسانی سے رابطہ کر سکیں۔ چودھری فواد نے کہاکہ ”سابق صدر ان دنوں امریکہ میں ہیں اور ممکنہ طور پر 26نومبر کولندن واپس آئیں گے۔ وہ دسمبر کے پہلے ہفتے میں بھارت کا مختصر دورہ کریں گے اور پھر اس کے بعد مستقل دبئی آجائیں گے۔“ متحدہ عرب امارات میں کئی پاکستانی سیاست دانوں نے وقتی پناہ لی ہے جن میں بے نظیر بھٹو، آصف زرداری اوراسحاق ڈار کے علاوہ سندھ کے سابق وزیراعلیٰ ارباب رحیم بھی شامل ہیں۔ دبئی میں بہت سے پاکستانی تجارت کرتے ہیں اور ماضی میں کراچی میں ہونے والے آپریشن کے بعد کئی سیاستدان تاجر اور طلباءجن کا تعلق کراچی سے تھا، دبئی جاکر آبادہو گئے ہیں۔
روزنامہ جنگ راولپنڈی

__________________

(وَقُل رَّبِّ ارْحَمْهُمَا كَمَا رَبَّيَانِي صَغِيرًا) اے میرے رب جس طرح انہوں نے مجھے بچپن سے پالا ہے اسی طرح تو بھی ان پر رحم فرما۔ (الاسراء: 23)