پرویز مشرف خود صدارت سے مستعفی ہوجائیں،کل دوتہاتی اکثریت ثابت کردینگے،نواز شریف
اسلام آباد(جنگ نیوز) امیر جماعت اسلامی پاکستان اور اے پی ڈی ایم کے رہنما قاضی حسین احمد نے مسلم لیگ (ن) کے قائد میاں نوازشریف کی مکمل حمایت کا اظہار کرتے ہوئے یقین دلایا ہے کہ وہ منتخب حکومت کیلئے کوئی مسائل پیدا نہیں کریں گے۔ انہوں نے مزید کہا کہ پرویز مشرف خود صدارت سے مستعفی ہو جائیں،پیر کو مسلم لیگ (ن) کے سربراہ میاں نوازشریف نے جماعت اسلامی پاکستان کے امیر قاضی حسین احمد سے ان کی رہائش گاہ پر ملاقات کی جس میں راجہ ظفر الحق، چوہدری نثار علی خان، اقبال ظفر جھگڑا، ڈاکٹر طارق فضل چوہدری کے علاوہ پروفیسر خورشید احمد بھی موجود تھے۔اس موقع پر (ن )لیگ کے سربراہ نے کہاکہ ہم کل دو تہائی اکثریت ثابت کر دیں گے،انہوں نے مزید کہاکہ معزول جج بحال ہو کر صدر کی آئینی حیثیت پر فیصلہ دینگے،ملاقات کے بعد مشترکہ پریس کانفرنس سے خطاب کرتے ہوئیمسلم لیگ (ن) کے سربراہ میاں نوازشریف نے کہا کہ وہ قاضی حسین احمد اور اے پی ڈی ایم کے خیالات اور مقاصد سے متفق ہیں اور ان کا اور اے پی ڈی ایم کا ایجنڈا ایک ہے۔ اختلاف صرف الیکشن میں حصہ لینے یا بائیکاٹ کرنے کے فیصلے پر تھا کیونکہ ہم مسلم لیگ (ق) کیلئے میدان خالی نہیں چھوڑنا چاہتے تھے۔ انہوں نے کہا کہ ہم عدلیہ بحال کرینگے اور وہ عدلیہ ہی صدر کی اہلیت کا فیصلہ کرے گی۔ ایک سوال کے جواب میں انہوں نے کہا کہ دہشت گردی کیخلاف جنگ کی تعریف اور مقاصد کی تشریح کی جائے۔ انہوں نے کہا کہ مسائل کو جنگ کی بجائے مذاکرات سے بھی حل کیا جا سکتا ہے۔ اگر بھارت سے مذاکرات ہو سکتے ہیں تو اپنوں کے ساتھ کیوں نہیں۔ انہوں نے کہا کہ 27 فروری کو مسلم لیگ (ن)، پیپلز پارٹی، اے این پی کے نو منتخب اور آزاد ارکان اجلاس طلب کر لیا گیا ہے اور ہمارا خیال ہے کہ ہمیں دو تہائی اکثریت حاصل ہے۔ قاضی حسین احمد نے کہا کہ میاں نوازشریف نے جن مقاصد کیلئے عام انتخابات میں حصہ لیا انہی مقاصد کیلئے ہم نے انتخابات کا بائیکاٹ کیا۔ انہوں نے کہا کہ ہمیں وزارتوں اور قومی و صوبائی اسمبلیوں میں نشستوں کی ضرورت نہیں، ہمارا مقصد ملک میں 1973ء کے آئین اور عدلیہ کی بحالی، قومی خود مختاری اور ملک کو امریکی بالادستی سے نجات دلانا اور محروم طبقات کو ان کا حق دلانا ہے۔ انہوں نے کہا کہ وہ منتخب حکومت کیلئے کوئی پریشانی پیدا نہیں کرینگے۔ پیپلز پارٹی اور مسلم لیگ (ن) کو موقع ملنا چاہئے کہ وہ پارلیمنٹ کی بالادستی، آئین، اور عدلیہ کی بحالی کیلئے کام کریں۔ انہوں نے کہا کہ ہم بیرونی طاقتوں کے مفاد میں کارروائی کرنے کے حق میں نہیں۔ ملک کو امریکی بالادستی سے نجات دلائی جائے۔

__________________