پرویز مشرف کی حمایت بش انتظامیہ کے غلط اندازوں کا نتیجہ ہے ،بارک اوباما
] واشنگٹن ۔۔۔۔۔امریکہ کے ممکنہ صدارتی امیدوار بارک اوباما نے کہا ہے کہ صدر پاکستان پرویز مشرف کے لئے بش انتظامیہ کی حمایت غلط اندازوں کا نتیجہ ہے۔ پاکستان میں متوسط طبقے کے لوگوں کی ایک بڑی تعداد ہے جو ملک میں قانون کی حکمرانی پر یقین رکھتی ہے اور ایسی حکومت چاہتی ہے جو قابل احتساب ہو۔ ایک نجی ٹی وی چینل کے مطابق بارک اوباما نے ان خیالات کا اظہار ایک میگزین کو دیئے گئے انٹرویو میں کیا۔ بارک اوباما نے کہا کہ بش انتظامیہ نے کچھ سوچے سمجھے بغیر صدر بش کی مکمل حمایت کی جس کا نتیجہ یہ نکلا کہ خطے میں دہشت گردی کے خلاف امریکہ کی جنگ کمزور پڑ گئی۔ بارک اوباما نے دعویٰ کیا کہ اگر امریکہ سمجھتا ہے کہ پاکستان جیسے ملک کی پارلیمنٹ میں آکسفورڈ کے تعلیم یافتہ لوگوں سے رابطہ کر کے ملک کی صورتحال کو سمجھا جا سکتا ہے تو یہ یقیناً غلطی ہو گی اور اس کے نتیجے میں کئی غلط اندازے لگا سکتے ہیں۔ انہوں نے کہا کہ بش انتظامیہ کو چاہئے تھا کہ وہ پاکستان کے متوسط طبقے کے ساتھ تعلقات کو فروغ دیتی جو ملک میں قانون کی حکمرانی پر یقین رکھتا ہے اور ایسی حکومت چاہتا ہے جو قابل احتساب ہو۔ انہوں نے کہا کہ اگر وہ صدارتی انتخابات میں کامیاب ہو گئے تو امریکیوں کی تقدیر بدل دیں گے انہوں نے کہا کہ بش انتظامیہ کی بعض پالیسیاں ایسی تھیں کہ اسے دہشت گردی کو ختم کرنے کی بجائے الٹا دہشت گردی کیخلاف امریکہ کی جنگ کمزور پڑ گئی۔