پیٹر برا کی ڈائری...خالد محمود جونوی...نامہ نگار:

جنرل پرویز مشرف کی کتاب مقامی بک سینٹرز میں پچاس پنس میں بکنے لگی۔ انگریزی میں”ان دی لائن آف فائر“ اور اُرود میں ”سب سے پہلے پاکستان“ نامی یہ کتاب جس کا دنیا کی کم و بیش ہر قابل ذکر زبان میں ترجمہ کرایا گیا اور امریکہ میں اس کی تقریب رونمائی پر بھی ہزاروں ڈالرزکے اخراجات آئے لیکن عبرت کی اس سے بڑی مثال اور کیا ہو گی کہ ان کی کتاب کا حشر بھی ان کے کوچہ اقتدار سے بے آبرو ہو کر نکلنے کی طرح ہوا اور اب یہ کتاب کوڑیوں کے مول مقامی بک سینٹرز میں بک رہی ہے بلکہ کوئی بھی گاہک ایک پونڈ میں تین کتابیں خرید سکتا ہے۔

سٹور کے منیجر کے مطابق ہمارے سٹاک میں دو تین درجن جلدیں تھیں اور ان میں سے بمشکل ہم ایک یا دو کتابیں ہی فروخت کر سکے ہیں۔ یہ ہماری کاروباری پالیسی ہے کہ ہم ایک مخصوص مدت تک ہی کتابوں کی فروخت کا انتظار کر سکتے ہیں اس کے بعد اگر کسی کتاب کی طلب زیادہ نہ ہو تو پھر سیل وغیرہ لگا کر چھٹکارہ حاصل کر سکتے ہیں لیکن اس کتاب کی چار مرتبہ قیمت کم کرنے کے باوجود ہم اس سے گلوخلاصی نہ کر سکے۔

قارئین کرام یہ کتاب کیا تھی، جنرل پرویز مشرف کی روشن خیالی اور اپنے آپ کو دنیا کے سامنے معتدل رہنما کے طور پر پیش کرنے کی ایک اشتہاری مہم تھی۔ شہر کے قرب و جوار میں آباد پاکستانی ہموطن آج ملک کے سارے مسائل کی جڑ جنرل پرویز مشرف کو گردانتے ہیں۔ ان کا کہنا ہے کہ اگرچہ سطحی قسم کے مسائل ہر ملک اور معاشرے میں ہوتے ہیں لیکن جنرل پرویز مشرف کی آمریت اپنے پیش رو دیگر آمروں کو بھی پیچھے چھوڑ گئی ہے جس میں ملک کو سنگین قسم کے خطرات لاحق ہوئے۔

1. جمہوریت پر شب خون مارنا، جامعہ حفصہ کی معصوم بچیوں کو زندہ جلا دینا،

2. قبائلی علاقوں میں نام نہاد آپریشن کر کے نفرتوں کو ہوا دینا،

3. عدلیہ کو یرغمال بنانے کی کوشش،

4. نام نہاد دہشت گردی کی آڑ میں بے گناہ لوگوں کو پکڑ کر امریکہ کے حوالے کر کے ڈالرز کمانا

5. اور محسن پاکستان ڈاکٹر عبدالقدیر خان کی تذلیل کرنا

ایسے قومی گناہ ہیں جنہیں قوم کبھی معاف نہیں کرے گی۔ ہموطنوں کو اس بات کا بھی بڑا رنج ہے کہ جنرل مشرف کے جانے سے نظام نہیں بلکہ چہرے بدلے ہیں۔ بدقسمتی سے موجودہ جمہوری حکومت بھی پرویز مشرف کی پالیسیوں پر گامزن ہے

حکومت کو چاہئے کہ وہ ہر قسم کی مصلحت کو بالائے طاق رکھتے ہوئے عوام دوست حکومت ہونے کا مظاہرہ کرتے ہوئے جنرل پرویز مشرف کا احتساب کرے وگرنہ کیا خبر کہ کل کوئی دوسرا جرنیل کوئی جواز بنا کر جمہوریت کی کشتی میں سوراخ کر دے۔ اس سلسلے میں حکومت کو کچھ زیادہ تگ و دو کرنے کی بھی ضرورت نہیں کیونکہ جنرل مشرف نے اپنے ” کارناموں “ کا اپنی کتاب میں خود اعتراف کیا ہے۔ اپنی اسی کتاب میں جنرل مشرف نے ”گوہر فشانی“ کرتے ہوئے ذوالفقار علی بھٹو کو ایک ”فاشسٹ“ قرار دیا ہے وہ بھٹو جس کے قومی کارہائے نمایاں اور ان کی قائدانہ صلاحیتوں کے ان کے سیاسی حریف بھی مداح تھے لیکن جنرل مشرف کے یہ ریمارکس دراصل عوام کے ہر دلعزیز نمائندوں کے خلاف ان کے بغض کا اظہار ہیں۔

ماخذ: روزنامہ جنگ ہفتہ 31‏ جنوری‏، 2009ء