پرویز مشرف ہزار انکار کریں ،ان کے پاس استعفے کے سوا کوئی راستہ نہیں،اعتزاز احسن
لاہور (جنگ نیوز) سپریم کورٹ بار ایسوسی ایشن کے صدر چوہدری اعتزاز احسن نے کہا پرویز مشرف ہزار انکار کریں، اب ان کے پاس استعفے کے علاوہ کوئی راستہ نہیں۔ افتخار محمد چوہدری سمیت دیگر ججز کی بحالی اب مہینوں کی نہیں‘ دنوں کی بات ہے، اگر ایسا نہ کیا گیا تو پھر شاید انہیں کسی دوسرے طریقے سے اقتدار سے علیحدہ ہونا پڑے۔ 9مارچ کو لانگ مارچ کے اعلان پر تمام وکلاء تنظیمیں متفق ہیں یہ کسی کے خلاف نہیں بلکہ پی سی او کے تحت حلف نہ اٹھانے والے ججز کے ساتھ اظہار یکجہتی کے لئے کیا جا رہا ہے‘ پیپلز پارٹی بے نظیر بھٹو شہید کے مشن کو آگے بڑھانے کے لئے ضرور عدلیہ بحال کرے گی۔ غیرملکی خبررساں ادارے سے گفتگو کرتے ہوئے انہوں نے کہا کہ انتخابات میں پرویز مشرف کے ان حواریوں کی شکست، جن کے لئے وہ خود ووٹ مانگتے رہے، اس کے بعد اب ان کے پاس مستعفی ہونے کے علاوہ کوئی راستہ نہیں اور اگر ایسا نہ کیا گیا تو پھر شاید انہیں کسی دوسرے طریقے سے اقتدار سے علیحدہ ہونا پڑے۔ ہم بھی نئی پارلیمنٹ کو موقع دینا چاہتے ہیں کہ وہ عدلیہ کی بحالی سمیت تمام مسائل کو حل کرے لیکن کسی کو یہ اجازت نہیں دیں گے کہ وہ عدلیہ کی بحالی سے انحراف کرے۔ 9مارچ کو لانگ مارچ کے حوالے سے تیاریاں کی جارہی ہیں اور اگر میری غیرآئینی نظربندی ختم نہ کی گئی تو لاکھوں وکلاء اس مارچ کی قیادت کے لئے موجود ہیں۔ انہوں نے کہا کہ جن وکلاء رہنماؤں نے ذاتی مفادات کی خاطر وکلاء تحریک کو نقصان پہنچایا اور جج بن گئے، قوم انہیں کسی بھی صورت معاف نہیں کرے گی۔ انہوں نے کہا کہ ماضی کے حکمران بھی کہتے تھے کہ ہم مستعفی نہیں ہوں گے لیکن اگلے دن ہی پتہ چلتا تھا کہ وہ اقتدار چھوڑ چکے ہیں۔ پرویز مشرف بھی اب ویسی ہی باتیں کر رہے ہیں۔

__________________