کینیڈین ماہرین نفسیات نے کہا ہے کہ پسماندہ اور غربت زدہ علاقوں میں نوجوان کمپیوٹرز اور ٹی وی کو زیادہ وقت دیتے ہیں جس سے ان کی تعلیمی کارکردگی بھی متاثر ہوتی ہے۔ مانٹریال میں سنیٹ جسٹین چلڈرن ہسپتال میں محقق ڈاکٹر ٹریسائی اے بارنٹ نے حال ہی میں کیے گئے سروے اور تحقیق کے حوالے سے بتایا کہ زیادہ تر وقت ٹی وی پر دستاویزی پروگرامز دیکھنے اور کمپیوٹرز پر نئی گیمز کھیلنے والے بچوں کی ذہنی صلاحتیں زیادہ اجاگر نہیں ہوتیں اور ایسے بچے موٹاپے کا شکار ہو جاتے ہیں۔ ماہرین نے بتایاکہ سروے میں شامل ہزاروں لڑکوں میں سے نصف جبکہ لڑکیوں میں سے ایک چوتھائی لڑکیاں ایک ہفتے میں 42 گھنٹے سے زیادہ وقت ٹی وی کی سکرین کے سامنے گزارتی ہیں اور امیر ترین علاقوں کی نسبت غربت زدہ علاقوں کے لڑکے لڑکیاں ٹی وی اور کمپیوٹرز کے سامنے زیادہ وقت گزارتے ہیں جس سے ان میں جارحانہ رویہ اور پر تشدد جذبات بھی پیدا ہوتے ہیں۔ ماہرین نے نوجوانوں کو ٹی وی اور کمپیوٹرز کے سامنے با مقصد وقت گزارنے کی ضرورت اور اہمیت پر زور دیا ہے