ریحانہ کی جانب سے دائر درخواست پر ایڈیشنل سیشن جج نے 4 مارچ کو مقدمے کا ریکارڈ طلب کرلیا
پشاور (نیوزرپورٹر) تھانہ ٹاﺅن کے علاقہ فالکن کمپلیکس سے غیرقانونی قیام کے الزام میں گرفتار امریکی شہری ایرین ڈی ہیون کی ضمانت پر رہائی کے لئے سیشن کورٹ میں درخواست دائرکردی گئی ہے اور ایڈیشنل سیشن جج الطاف الرحمان نے 4 مارچ کو مقدمے کا ریکارڈ طلب کرلیا ہے۔ قبل ازیں جوڈیشل مجسٹریٹ پشاور نے اس کی ضمانت پر رہائی کی درخواست خارج کی تھی یہ درخواست ایرن ڈی ہیون کی پاکستانی مسلمان بیوی ریحانہ کی جانب سے علی رضا ایڈووکیٹ کے توسط سے دائر کی گئی ہے۔ درخواست میں موقف اختیار کیا گیا ہے کہ درخواست گذار ایرن ڈی ہیون نے پاکستان میں اربوں روپوں کی سرمایہ کاری کی ہوئی ہے اور وہ باقاعدہ طور پر کاروباری ویزے پر پاکستان آیا اور اس ویزے میں دو مرتبہ توسیع بھی کی جاچکی ہے جس کے لئے باقاعدہ درخواست دی گئی تھی اور اب ایک بار پھر ویزے میں توسیع کے لئے جنوری 2011 میں درخواست دی جاچکی ہے جس کا باقاعدہ ریکارڈ موجود ہے جبکہ صوبائی حکومت کو یہ اختیار حاصل نہیں کہ وہ کسی غیرملکی کو غیرقانونی قیام کے الزام میں گرفتار کرے کیونکہ یہ وفاقی سبجیکٹ ہے عدالت نے درخواست کی سماعت کے لئے 4 مارچ کی تاریخ مقرر کرتے ہوئے ریکارڈ طلب کرلیا ہے۔

روزنامہ جنگ راولپنڈی

__________________

(وَقُل رَّبِّ ارْحَمْهُمَا كَمَا رَبَّيَانِي صَغِيرًا) اے میرے رب جس طرح انہوں نے مجھے بچپن سے پالا ہے اسی طرح تو بھی ان پر رحم فرما۔ (الاسراء: 23)