پاکستان کے صوبہ خیبر پختونخواہ کے دارالحکومت پشاور میں یونیورسٹی روڈ پر واقع سی آئی ڈی تھانے پر خودکش ٹرک بم حملے میں سات پولیس اہلکار ہلاک اور ستائیس زخمی ہو گئے ہیں جبکہ کم از کم پانچ پولیس اہلکار تھانے کی عمارت کے ملبے تلے دبے ہوئے ہیں۔

کلِک پشاور میں تھانے پر حملہ، تصاویر

پولیس افسر شفیع اللہ نے نامہ نگار دلاورخان وزیر کو بتایا ہے کہ یہ حملہ بدھ کی صُبح پانچ بجے کے قریب اس وقت ہوا جب نامعلوم خودکُش حملہ آور نے پشاور چھاؤنی کے علاقے میں واقع سی آئی ڈی تھانے سے ایک شہ زور گاڑی ٹکرا دی جس سے تھانے کی دو منزلہ عمارت زمین بوس ہوگئی۔

انہوں نے کہا کہ ملبے سے اب تک سات لاشیں نکال لی گئی ہیں اور پانچ سے زیادہ اہلکار ملبے تلے دبے ہوئے ہیں جنہیں نکالنے کے لیے امدادی کارروائیاں جاری ہیں۔

انہوں نے بتایا کہ حملے کے وقت تھانے میں بیس سے پچیس تک اہلکار موجود تھے۔

ان کا کہنا تھا کہ خودکش کار بم حملے میں بائیس افراد زخمی بھی ہوئے ہیں جن میں نو پولیس اہلکار شامل ہیں۔ پولیس اہلکار کے مطابق زخمیوں کو لیڈی ریڈنگ ہسپتال، خیبر ٹیچنگ حیات آباد کمپلیکس ہسپتال منتقل کردیا گیا ہے اور زخمی اہلکاروں میں سے تین کی حالت تشویش ناک بتائی جاتی ہے۔

سی آئی ڈی تھانہ شہر کے ایک حساس علاقے میں واقع ہے جہاں سے امریکی قونصل خانہ زیادہ دور نہیں ہے اور دو سو گز کے فاصلے پر سکیورٹی فورسز کی ایک چوکی بھی موجود ہے جہاں سے چوبیس گھنٹے آنے جانے والے گاڑیوں پر نظر رکھی جاتی ہے۔اہلکار کے مطابق حملہ ایک شہ زور پک گاڑی کے ذریعے سے کیا گیا جس سے تھانے کی عمارت مکمل طور پر تباہ ہو گئی اور قریب ہی دوسرے عمارتوں کے شیشے ٹوٹ گئے ہیں۔ انہوں نے بتایا کہ حملے میں دو سو سے دو سو پچاس کلوگرام تک بارودی مواد استعمال کیاگیا ہے۔

پولیس نے تھانے کو جانے والی تمام سڑکوں کو بند کر دیا ہے۔کسی کو وہاں جانے کی اجازت نہیں ہے۔تھانے کے اردگرد پولیس اور فوج کی بھاری نفری موجود ہے۔

پشاور میں سی آئی ڈی پولیس تھانے پر خود کُش کار بم حملے کی ذمہ داری ایک غیر معروف تنظیم التوحید الجہاد نے قبول کرلی ہے۔ خود کو اس تنظیم کا ترجمان ظاہر کرنے والے ایک شخص انصار العربی نے بی بی سی کو فون پر بتایا کہ التوحید الجہاد تحریک طالبان پاکستان پشاور کا ایک ونگ ہے۔ انہوں نے بتایا کہ یہ حملہ اُسامہ بن لادن کے ہلاکت کا ایک سلسلہ ہے۔

سی آئی ڈی تھانہ شہر کے ایک حساس علاقے میں واقع ہے جہاں سے امریکی قونصل خانہ زیادہ دور نہیں ہے اور دو سو گز کے فاصلے پر سکیورٹی فورسز کی ایک چوکی بھی موجود ہے جہاں سے چوبیس گھنٹے آنے جانے والے گاڑیوں پر نظر رکھی جاتی ہے۔

یاد رہے کہ اس تھانے پر پہلے بھی ایک راکٹ حملہ ہوا تھا جس کے بعد سے تھانے کی حفاظت کے لیے پولیس نے چاروں اطراف میں مٹی سے بھری بوریوں کی ایک دیوار بنا دی گئی تھی اور تھانے کے سامنے ایک چوکی میں ایک مُسلح پولیس اہلکار بھی ہر وقت موجود رہتا ہے۔

ح

__________________