پشاور کینٹ کے بابر لین علاقے میں ایک خاتون خودکش بمبار نے ایک فوجی چیک پوسٹ پر حملہ کیا ہے۔
حکام کے مطابق اس حملے میں سکیورٹی فورسز کا کوئی جانی نقصان نہیں ہوا۔

بابر لین جہاں خودکش بم حملہ ہوا وہ پشاور چھاؤنی کا انتہائی حساس علاقہ سمجھا جاتا ہے جہاں ریٹائرڈ اور حاضر سروس فوجی افسروں کے علاوہ شہر کے متمول افراد بڑے بڑے بنگلوں میں رہائش پذیر ہیں۔

حکام کے مطابق روایتی افغان برقعے میں ملبوس ایک خاتون ایک فوجی چیک پوسٹ کے قریب آئی اور جب اسے روکا گیا تو اس نے خود کو ایک دھماکہ سے اڑا دیا۔

سرکاری حکام کا کہنا ہے کہ یہ ایک خود کش حملہ تھا جس میں کوئی فوجی اہلکار ہلاک نہیں ہوا۔

حالیہ دنوں میں یہ پہلا موقعہ ہے جب ایک خاتون کو خود کش حملے کے لیے استعمال کیا گیا ہے۔

گزشتہ چند روز سے چھاؤنی کے علاقے میں معمول سے زیادہ سکیورٹی دیکھی جا رہی تھی اور کئی اضافی چیک پوسٹیں قائم کی گئی تھی۔

بشکریہ بی بی سی