گورنر پنجاب سلمان تاثیر نے پنجاب اسمبلی کا اجلاس (آج) صبح 9 بجے طلب کر لیا۔ میاں شہبازشریف اپنی رکنیت کا حلف اٹھائیں گے
وزیٹرز گیلری نہ ہونے کے با عث ارکان اسمبلی اپنے مہمانوں کو اجلاس میں نہ لائیں۔ سیکرٹری پنجاب اسمبلی کی ہدایت
لاہور ۔۔۔۔۔۔پنجاب اسمبلی کا اہم اجلاس (آج) جمعہ کو صبح 9 بجے طلب کر لیا گیا ہے جس کی صدارت سپیکر صوبائی اسمبلی پنجاب رانا محمد اقبال خان کریں گے۔ گورنر پنجاب سلمان تاثیر نے اسلامی جمہوریہ پاکستان کے آئین 1973ء کے آرٹیکل 109 کے تحت حاصل اختیارات کو بروئے کار لاتے ہوئے مذکورہ اجلاس طلب کرنے کے احکامات جاری کئے ہیں۔ اجلاس میں صوبائی اسمبلی کے حلقہ پی پی 48 بھکر ll سے بلا مقابلہ منتخب ہونیوالے ممبر صوبائی اسمبلی و مرکزی صدر مسلم لیگ (ن) میاں شہبازشریف اپنے عہدہ کا حلف اٹھائیں گے۔ سیکرٹری پنجاب اسمبلی نے جمعرات کے روز اے پی پی سے بات چیت کے دوران بتایا کہ اجلاس کے انعقاد کیلئے تمام تیاریاں مکمل کر لی گئی ہیں۔ انہوں نے بتایا کہ پنجاب اسمبلی کے ہائوس میں جگہ کی قلت کے باعث مہمانوں کی گیلری کو معزز اراکین کیلئے مخصوص کر دیا گیا ہے۔ انہوں نے کہا کہ مذکورہ گیلری میں پریس اور الیکٹرانکس میڈیا کے نمائندے بھی اپنے فرائض کی سرانجام دہی کیلئے موجود ہوتے ہیں اس لئے گیلری میں مہمانوں کے بیٹھنے کیلئے کوئی گنجائش نہ ہے۔ انہوں نے تمام معزز ممبران صوبائی اسمبلی کو ہدایت کی کہ وہ وزیٹرز گیلری میں گنجائش نہ ہونے کے باعث اسمبلی کے اجلاس میں شرکت کے وقت اپنے مہمانوں کو ہمراہ نہ لائیں تاکہ بعدازاں کسی قسم کی بدنظمی سے بچا جا سکے۔ انہوں نے مزید کہا کہ اجلاس کے تمام شرکاء سکیورٹی کے فول پروف انتظامات کو یقینی بنانے کیلئے سکیورٹی سٹاف سے بھی بھرپور تعاون یقینی بنائیں۔